काठमाडौँ, २० पुस । देशकै सबैभन्दा पुरानो अस्पताल बीर अस्पतालमा चौबिस घण्टा डायलासिस सेवा सुरु भएको छ । यसअघि सो अस्पतालमा विहान र दिउसो गरी दुई सिफ्टमा मात्रै डायलासिस हुने गर्दथ्यो । २५ बर्ष अघि देखि डायलासिस सेवा दिइरहेको बीरले सो सेवालाई चौबिस घण्टे बनाएको भने भर्खर मात्रै हो ।

अस्पतालका निर्देशक प्राडा भुपेन्द्रकुमार बस्नेतले गत पुस १७ (जनवरी १) देखि डायलासिस सेवा चौबिस घण्टे बनाएको बताए । ‘अस्पतालमा ९ वटा डायलासिस मेसिन छ । यसअघि सम्म ती मेसिनहरु विहान दिउसोको सिफ्ट मात्रै चल्ने गर्दथे तर अव हामी चौविसै घण्टा चलाउन थालेका छौँ,’ डा. बस्नेतले भने, ‘विहान, दिउसो र अपरान्हको समय बाहिरका विरामीलाई र रातीको सिफ्टमा भर्ना भएका बिरामीको डायलासिस गर्ने व्यवस्था मिलाइएको छ ।’

उनले यसअघि साताको दुईपटक डायलासिस गराउने व्यक्तिले अव साताको तीन पटक निशुल्क डायलासिस गर्न सक्ने समेत बताए । निर्देशक बस्नेतले डायलासिस सेवा विश्वस्तरको बनाउने अभियान अनुरुप विरामीलाई साताको तीन पटक सेवा दिन लागेको बताए ।

यसैबीच बीर अस्पतालमा केही बर्ष यता रोकिएको मिर्गौला प्रत्यारोपण सेवा पुन सूचारु भएको छ । निर्देशक डा . बस्नेतका अनुसार अहिले अस्पतालमा हरेक हप्ता एक जनाको प्रत्यारोपण हुने गरेको छ । डा. पारसमणी श्रेष्ठ र डा. अनिल श्रेष्ठको नेतृत्वमा प्रत्यारोपण सेवा भईरहेको छ,’ डा. बस्नेतले भने ।

गरीब तथा विपन्नले सेवा लिने अस्पतालको रुपमा चिनिएको बीर अस्पतालमा नयाँ नेतृत्व आएसंगै सुधारका संकेत देखिन थालेका छन् ।