सुर्खेत, ३० असोज । नक्कली चिकित्सक बनी ठगी गरेको आरोपमा प्रहरीले वीरेन्द्रनगरबाट एक जनालाई पक्राउ गरेको छ । वीरेन्द्रनगर ६ स्थित समाज डेन्टल केयर क्लिनिकका सञ्चालक २२ वर्षीय डिलबहादुर महतारालाई बुधबार प्रहरीले पक्राउ गरेको हो ।

उनी जाजरकोट शिवालय गाउँपालिकाका बासिन्दा हुन् ।

प्रहरीका अनुसार वीरेन्द्रनगरको एक महिला महताराको क्लिनिकमा उपचारका लागि गएकी थिईन् ।

दाँत अध्यधिक दुखे पछि उपचारका लागि जाँदा उनलाई उनै महताराले दन्त चिकित्सकको रुपमा आफूलाई प्रस्तुत गर्दै उपचारका लागि अघि सरेका थिए । उनले ती महिलाको उपचार गरे जस्तो गर्दै दुखेको दाँत निकाल्नु पर्ने सुझाव दिएका थिए । सुझाव अनुसार महिलाले दाँत निकाल्नका लागि पैसा तिरिन । तर महताराले दुख्ने दाँतसंगै नदुख्ने दाँत पनि निकालिदिए ।

उनको काममा शंका लागेपछि ती महिलाले प्रहरीमा उजुरी दिएकी थिईन् । प्रहरीले गत बुधबार महतारालाई उनकै क्लिनिकबाट पक्राउ गरेको छ ।

‘उनी क्लिनिक संचालक हुन् । दन्त चिकित्सा सम्वन्धी कुनै अध्ययन् गरेको पाईएन्,’ जिल्ला प्रहरी प्रमुख एसपी पदबहादुर विष्टले अगाडी थपे ‘प्रारम्भिक बयानका क्रममा महताराले आफूले नक्कली चिकित्सकको रुपमा काम गर्दै आएको स्वीकार गरेका छन् ।’