काठमाडौँ, २ साउन । सरकारले राष्ट्रिय खोप कार्यक्रममा थप दुईवटा नयाँ खोप थप्ने भएको छ ।

नयाँ थपिने खोपहरुमा रोटाभाइरस विरुद्धको खोप र पोलियो रोग विरुद्धको खोप एफआईपीभी रहेका छन् ।

स्वास्थ्य सेवा विभाग बाल स्वास्थ्य महाशाखा खोप शाखा प्रमुख कृष्णबहादुर चन्दले दुई खोप थपिन लागेको जानकारी दिए । उनले पोलियो रोग विरुद्धको खोप एफआईपीभी आगामी कात्तिक मंसिर र रोटाभाइरस विरुद्धको खोप पुस माघसम्म कार्यान्वयनमा ल्याउने तयारी गरेको छ । दुबै खोप गाभीको सहयोगमा आउन लागेको हो ।

बाल स्वास्थ्य महाशाखाका खोप अधिकृत भरत भण्डारीले रोटाभाईरसको खोप ६ र १० हप्तामा गरी दुईपटक मुखबाट खुवाउने र एफआईपीभी सुईको रुपमा लगाउने बताए ।

उनले सन २०१५मा सुरु भएको आईपीभी खोप अभावका कारण बन्द भएपछि विकल्पको रुपमा नयाँ खोप एफआईपीभी सूर गर्न लागिएको बताए । रोटाभाइरसको खोप भने पनि नयाँ हो । यो खोप निजी स्वास्थ्य संस्थाले महंगो शुल्क लिएर लगाउने गरेको छ ।

सरकारले राष्ट्रिय खोप कार्यक्रम मार्फत बालबालिकालाई ११ वटा खोप निशुल्क उपलव्ध गराउँदै आएको छ ।