काठमाडौं, ९ असोज । नेपालले आगामी मंसिरको तेस्रो साता एसियाली फ्रैल्टी तथा साकोपेनिया सम्मेलन गर्ने भएको छ ।

‘कन्फ्ररेन्स अन फ्रैल्टी एण्ड साकोपेनिया ( एसीएफएस -२०२६)’ नाम दिइएको यो सम्मेलनमा स्वस्थ बुढ्यौली, जेष्ठ नागरिकको स्वास्थ्य तथा उमेरसंग सम्वन्धित शारीरिक कमजोरी र मांसपेशी क्षयका विषयमा केन्द्रीत हुने बताइएको छ ।

सोसाइटी अफ जेरोन्टोलोजी एण्ड जेरियाट्रिक्स र नेपाल जेरियाट्रिक्स सेन्टरको संयुक्त आयोजनामा हुने सम्मेलन १९ र २० मंसिर ( डिसेम्बर ५ र ६ तारिख) का दिन काठमाडौँमा हुने बताइएको छ । सम्मेलनको संयोजन गरिरहेका डा. जगदीश क्षेत्रीका अनुसार मुख्य कार्यक्रमको अघिल्लो दिन अर्थात डिसेम्बर ४ मा नेपाल जेरियाट्रिक्स सेन्टरमा पूर्व–सम्मेलन कार्यशाला आयोजना गरिनेछ।

सम्मेलनमा १०० भन्दा बढी विदेशी विज्ञ तथा प्रतिनिधि र त्यतिकै संख्यामा नेपाली स्वास्थ्यकर्मी तथा विज्ञ सहभागी हुने अपेक्षा गरिएको छ।

यस वर्षको सम्मेलनको मूल विषय “Towards Building Strength and Vitality in Old Age for Healthy Aging” अर्थात् “स्वस्थ बुढ्यौलीका लागि वृद्धावस्थामा शक्ति र जीवन्तता निर्माणतर्फ” रहेको छ।

सम्मेलनमा फ्रैल्टी (Frailty) तथा साकोपेनिया (Sarcopenia) सम्बन्धी विशेष छलफल हुनेछ। समयमै पहिचान, रोकथाम, पोषण, व्यायाम, पुनर्स्थापना तथा शारीरिक क्षमता र स्वतन्त्रता कायम राख्ने उपायहरूमा विशेष जोड दिइनेछ।

डिसेम्बर ४ मा आयोजना हुने पूर्व–सम्मेलन कार्यशालाले स्वास्थ्यकर्मीहरूलाई फ्रैल्टी, साकोपेनिया तथा ज्येष्ठ नागरिकको समग्र स्वास्थ्य मूल्याङ्कन र व्यवस्थापनका विषयमा थप व्यावहारिक ज्ञान हासिल गर्ने अवसर प्रदान गर्नेछ।

नेपालका लागि यो सम्मेलन जेरियाट्रिक चिकित्सा तथा स्वस्थ बुढ्यौलीका क्षेत्रमा अन्तर्राष्ट्रिय सहकार्य विस्तार गर्ने, अनुसन्धानलाई प्रोत्साहन गर्ने र नेपाली स्वास्थ्यकर्मीको क्षमता अभिवृद्धि गर्ने महत्वपूर्ण अवसरका रूपमा हेरिएको छ।

दक्षिण एसियामा ज्येष्ठ नागरिकको जनसंख्या निरन्तर बढिरहेको अवस्थामा स्वस्थ र सक्रिय बुढ्यौलीका लागि वैज्ञानिक तथा प्रमाणमा आधारित स्वास्थ्य सेवाको आवश्यकता अझ बढ्दै गएको छ।

करिब २०० जना राष्ट्रिय तथा अन्तर्राष्ट्रिय सहभागीको उपस्थिति रहने अपेक्षा गरिएको ACFS 2026 ले काठमाडौंलाई स्वस्थ बुढ्यौली, ज्येष्ठ नागरिकको स्वास्थ्य र स्वतन्त्र जीवनका लागि क्षेत्रीय वैज्ञानिक संवादको महत्वपूर्ण केन्द्रका रूपमा प्रस्तुत गर्ने अपेक्षा गरिएको छ।