काठमाडौँ, १७ बैशाख । सुर्तीजन्य पदार्थको प्याकेटमा १०० प्रतिशत भाग चेतावनीमुलक चित्रसहितको स्वास्थ्य सन्देशले छोप्नु पर्ने नयाँ निर्देशिका कार्यान्वयन नगर्न माग गर्दै जापान टोबाको इन्टरनेशन (जेटीआई)ले स्वास्थ्य मन्त्री प्रदीप पौडेललाई चिठी पठाएको छ ।

गत २१ मार्च (८ चैत २०८१)मा लेखेको चिठीको बोधार्थ उद्योग, बाणिज्य आपूर्ति मन्त्री, अर्थ मन्त्री, मुख्य सचिव र नेपालस्थित जापानी दुतावासलाई दिईएको छ ।

जेटीआईले गत ८ चैतमै स्वास्थ्य मन्त्रीलाई चिठी लेखेको भए पनि त्यो गुपचुप नै थियो । तर उद्योग बाणिज्य तथा आपूर्ति मन्त्रालयले नयाँ निर्देशिका कार्यान्वयन नगर्नका लागि स्वास्थ्य तथा जनसंख्या मन्त्रालयलाई जब चिठी पठायो त्यसपछि मात्रै जेटीआईको चिठीको विषय बाहिर आएको हो । उद्योगले गत १७ चैतमा स्वास्थ्यलाई लेखेको चिठीमा जेटीआईले स्वास्थ्य मन्त्रीलाई लेखेको चिठी आफूलाई बोधार्थ भएर आएको प्रसंग जोडेको थियो ।

उद्योगले पठाएको चिठीमा पनि गत २१ माघमा स्वास्थ्य मन्त्री प्रदीप पौडेलले मन्त्रीस्तरीय निर्णय गर्दै जारी गरेको ‘सुर्तीजन्य पदार्थको बट्टा, प्याकेट, र्‍यापर्स, पेटी तथा पार्सल प्याकेजिङमा चेतावनीमुलक सन्देश र चित्र छाप्ने तथा अंकित गर्ने निर्देशिका – २०८१’ कार्यान्वयन नल्याउन आग्रह गरिएको छ ।

सोही आग्रह जेटीआईले पनि गरेको छ ।

उसले चित्र तथा सन्देश बढाएर प्रयोगकर्ता नघट्ने दावी गर्दै स्वास्थ्य सचेतनाकै लागि भनेर सत प्रतिशत भागमा सन्देश राख्न नपर्ने उल्लेख गरेको छ । चिठीमा उसले नेपालीहरु स्वास्थ्य सचेतनामा निकै अगाडी रहेको समेत ठोकुवा गरेको छ ।

नेपालमा जेटीआईले उत्पादन गरेका क्यामल र विन्स्टन चुरोट बिक्री हुने गर्दछ । त्यसको वितरण जिम्मा परफेक्ट ब्लेन्ड्स नेपाल प्रालिले लिएको समेत बताएको छ ।

जेटीआईले निर्देशिका फिर्ता नलिएर सत प्रतिशत चित्र छाप्ने नयाँ निर्देशिकाको कार्यान्वयन गर्ने तयारी ६ महिना भित्र नभई एक वर्ष दिन पनि माग गरेको छ ।

यसअघि निर्देशिका परिवर्तन हुँदा नेपाली सुर्ती उद्योगहरु अदालत नै जाने गरेका थिए । यसपटक भने उनीहरुको आवाज बनेर उद्योग मन्त्रालय र जेटीआई स्वास्थ्य मन्त्रालय समक्ष आएको छ । र अन्तराष्ट्रिय चुरोट कम्पनीले यसरी स्वास्थ्य मन्त्रीलाई सम्वोधन गर्दै पत्र पठाएको सम्भवत पहिलो पटक हो ।

• सुर्तीजन्य पदार्थमा सत-प्रतिशत चित्र छाप्ने निर्देशिकामा पुनरावलोकन गर्नु भन्दै उद्योगले पठायो स्वास्थ्यलाई पत्र

नेपालमा सुर्तीजन्य पदार्थको प्रयोगबाट बार्षिक ३९ हजार २०० बढी व्यक्तिहरुको मृत्यु हुने गरेको छ । तसर्थ यसको प्रयोग नियन्त्रण गर्ने विभिन्न उपाय मध्येको एक सुर्तीजन्य पदार्थको प्याकेटको सत प्रतिशत भागमा चेतावनीमुलक चित्र अंकित स्वास्थ्य सन्देश छाप्ने निर्देशिका कार्यान्वयनमा ल्याउन लागेको हो ।

• सुर्तीजन्य पदार्थको प्याकेटमा सत प्रतिशत चित्र छाप्ने निर्देशिकाबिरुद्ध गएर पत्र काटेपछि उद्योग मन्त्रालयका नाममा सर्बोच्चको कारण देखाउ आदेश

स्वास्थ्य मन्त्रालयका कानून शाखा उपसचिव गोपीकृष्ण रेग्मीले पारित भईसकेको निर्देशिका तोकिएकै समयमा कार्यान्व्यनमा आउने भन्दै कसैको पत्र अनुरोध आग्रहले फरक नपर्ने बताउछन् ।

नयाँ निर्देशिका आगामी १ भदौ देखि कार्यान्वयनमा ल्याउने सरकारको तयारी छ ।