काठमाडौँ, १९ फागुन । पूर्व युवराज पारस शाहलाई हृदयघात भएको छ । उनको अहिले थापाथलीस्थित नर्भिक इन्टरनेशनल अस्पतालमा उपचार चलिरहेको छ । उनको उपचारमा डा यादवदेव भट्टको टोली खटिएकोे छ ।

अस्पताल स्रोतका अनुसार हिजो अपरान्ह साढे चार बजे तिर शाहलाई असैह छाती दुखेको भन्दै उपचारका लागि नर्भिक पुर्‍याइएको थियो । आकस्मिक कक्षमा राखी जाँच पश्चात् उनको तत्कालै क्याथल्यावमा सारेर कोरोनरी एन्जियोग्राम गर्दा मुटुको धमनी पूर्ण रुपमा बन्द रहेको पाइएको थियो । चिकित्सकले (अवरोध) खुलाउन कोरोनरी एन्जियोप्लाष्टी तथा स्टेन्ट प्रत्यारोपण गरेका थिए ।

‘हिजो नै स्टेन्ट हालिएको हो । अहिले उहाँको अवस्था स्टेवल छ,’ उपचारमा सम्लग्न एक चिकित्सकले भने ।

पूर्वयुवराज पारसलाई हृदयघात भएको यो चौथो पटक हो । उनको मुटुमा स्टेन्ट हालिएको पनि चौथो पटक भएको ती चिकित्सकले बताए ।

‘जब डिस्चार्ज हुने अवस्था आउँछ तब खतरामुक्त भन्न मिल्छ । अहिलेलाई स्थीर भनौँ । उहाँमा पटक पटक यो समस्या बल्झिरहेको कारणले पनि केही जोखिम त हुन्छ नै,’ ती चिकित्सकले थपे ।

अहिले अस्पतालमा परिवारका सदस्यहरुको उपस्थिति रहेको छ ।