काठमाडौँ, ३ मंसिर । पूर्वसभामुख दमननाथ ढुंगानाको निधनमा सरकारले आज सार्वजनिक बिदा दिने निर्णय गरेको छ । आज बसेको मन्त्रिपरिषद बैठकले सार्वजनिक बिदा दिने निर्णय गरेको सरकारका प्रवक्ता एवम् सूचना तथा सञ्चार प्रविधिमन्त्री पृथ्वीसुब्बा गुरुङले जानकारी दिए ।

यस्तै आज सरकारी कार्यालयहरुमा राष्ट्रिय झन्डा आधा झुकाउने निर्णय पनि गरेको छ।

कलेजोसँग सम्बन्धित समस्याका कारण केही समयदेखि उपचाररत ८३ वर्षीय पूर्वसभामुख ढुङ्गाना आइतबार बत्तिसपुतलीस्थित आफ्नै निवासमा परिवारका सदस्यसंग कुरा गर्दा गर्दै बेहोस भएर लडेका थिए । त्यस लगत्तै बानेश्वरस्थित फ्रन्टलाइन अस्पताल लैजाने क्रममा अस्पताल नपुग्दै उनको निधन भएको थियो । ढुङ्गानाको पार्थिव शरीर त्रिभुवन विश्वविद्यालय शिक्षण अस्पतालस्थित शवगृहमा राखिएको छ ।

स्व ढुङ्गानाको पार्थिव शरीर श्रद्धाञ्जलीका लागि आज बिहान ११ बजेदेखि ज्ञानेश्वरस्थित सानो गौचरणमा राखिने भएको छ ।

सानोगौचरणमा श्रद्धाञ्जलीपछि उनको पार्थिव शरीर अन्त्येष्टि पशुपति आर्यघाटमा गरिने स्व ढुङ्गानाका परिवार स्रोतले जानकारी दियो ।