कोरोना संक्रमणबाट ‘सीअहेव’को मृत्यु

- नेपाली हेल्थ

काठमाडौँ, १२ असोज । कोरोना भाइरसको संक्रमणबाट आज एक जना सीअहेवको मृत्यु भएको छ । पर्सा जिल्लाको जगरनाथपुर गाँउपालिका स्वास्थ्य शाखामा कार्यतर सीअहेव रामसिकिल प्रसाद साहको आज विहान साढे ८ बजे काठमाडौँको करुणा अस्पतालमा ज्यान गएको हो ।

मनरा नगरपालिका ७ महोत्तरी घर भएका ५८ बर्षीय साह गत १९ भदौ देखि विरामी परेका थिए । ज्वरो आउने, खोकी लाग्ने समस्या भएपछि १९ असोजमा जगरनाथपुरबाट घर गएको स्वास्थ्य कार्यालय पर्साका कर्मचारी जैमुद ठाकुरले जानकारी दिए ।

‘घर गइसकेपछि उहाँ जनकपुरस्थित चन्द्रकला अस्पतालमा उपचार गराउनु भएछ । सिकिस्त भएपछि गत १ असोजमा काठमाडौँ रिफर हुनुभएछ । त्रिवि शिक्षण अस्पतालमा रेफर गरिएपनि आइसोलेसन वार्ड खाली नभएपछि बुढानिलकण्ठस्थित करुणा अस्पताल लगिएको रहेछ । त्यहि भेन्टिलेटरमा उपचारका क्रममा उहाँको ज्यान गयो,’ ठाकुरले भने ।

प्रदेश नं २ का स्वास्थ्य निर्देशक विजय झाले साह कोरोना संक्रमणबाट ज्यान गुमाउने सरकारी सेवाका कार्यरत पहिलो स्वास्थ्यकर्मी रहेको बताए । संघीय सरकारले कोरोनाबाट ज्यान गुमाउने स्वास्थ्यकर्मीको परिवारलाई २५ लाख रुपैयाँ क्षतिपूर्ति दिने निर्णय गरेको छ ।


Facebook Comment


थप समाचार