दाङ, १ कात्तिक । लुम्बिनी प्रदेश सरकारले स्वास्थ्यका विषयमा सातवटा नीतिगत निर्णय गरेको छ ।

आज बसेको प्रदेश मन्त्रिपरिषद्को बैठकले स्वास्थ्यका विषयमा दीर्घकालीन महत्व राख्ने सातवटा महत्वपूर्ण निर्णय गरेको गृह मन्त्री समेत रहेका सरकारका प्रवक्ता सन्तोषकुमार पाण्डेयले बताए ।

उनले जनताको पक्षमा केही महत्वपूर्ण निर्णय गरेको भन्दै यसले प्रदेशवासीलाई ठूलो सहयोग हुने दावी गरे ।

के के भयो सात वटा निर्णय ?
लुम्बिनी प्रदेश सरकारका प्रवक्ता समेत रहेका गृह मन्त्री पाण्डेयले बुधबारको बैठकले पहिलो नम्बरमा सिक्कलसेल एनिमिया र हेमोफिलियाका बिरामी र परिवारलाई निशुल्क बीमा कार्यक्रम सञ्चालन गर्ने कार्यविधि – २०८० स्वीकृत गरेको बताए ।

उनले आजकै बैठकले आँखाको नानी निशुल्क प्रत्यारोपण गर्नका लागि सोधभर्ना सम्वन्धी कार्यविधि – २०८० पनि स्वीकृत गरेको जानकारी दिए ।

यसैगरी ४० बर्ष भन्दा माथिको लागि नसर्ने रोगहरु (मधुमेह, उच्च रक्तचाप र मिर्गौला)को स्क्रिनिङ्ग कार्यक्रम सञ्चालन कार्यविधि – २०८० पनि स्वीकृत गरेको छ ।

यस्तै मन्त्री पाण्डेयले चौथो निर्णयको रुपमा जेष्ठ तथा अति अशक्त नागरिकसंग स्वास्थ्यकर्मी कार्यक्रम सञ्चालन कार्यरविधि – २०८० पनि स्वीकृत भएको जानकारी दिए ।

यस्तै स्वास्थ्य संस्था स्थापना, सञ्चालन नविकरण तथा स्तरोन्नती चौथो संसोधन नियमावली  -२०८० पनि स्वीकृत भएको छ ।

यसैगरी अस्पताल विकास समिति गठन तथा सञ्चालन नियमावली – २०८० स्वीकृत गरेको छ ।

यस्तै प्रदेश सरकार अन्तरगर्त रहेका १३ वटा अस्पतालका अस्पताल विकास समिति गठन आदेशहरु खारेज गर्ने र खारेजीको सूचना राजपत्रमा प्रकाशित गर्ने निर्णय भएको उनले बताए ।