कोरोनाको विषयमा नेपालका परराष्ट्रमन्त्रीले भारतीय समकक्षीसंग छलफल गर्दै
काठमाडौँ, २७ चैत । कोरोना संक्रमणको पछिल्लो अवस्था बारेमा नेपाल र भारतका परराष्ट्रमन्त्रीबीच छलफल हुने भएको छ । आज अपरान्ह पौने चार बजे परराष्ट्रमन्त्री प्रदीप ज्ञवाली र भारतीय विदेशमन्त्री एस जयशंकरबीच टेलिफोनमार्फत छलफल हुने भएको हो ।
भारतमा कोरोना भाइरसको संक्रमण पछिल्लो साता तिब्र गतिमा बढेको छ । त्यसको प्रभाव नेपालमा पनि देखिन थालेको छ । विशेषत भारतमा देखिएको कोरोना संक्रमण र नेपालमा पनि त्यसको असर देखिन सक्ने अवस्थाका बारेमा छलफल हुने भएको हो ।
‘खुल्ला सिमा छ । भारतमा बढी रहेको छ । नेपालमा पनि त्यसको संकेत देखिन थालेको छ । यसलाई दुई देश मिलेर नियन्त्रणका लागि हरसम्भव प्रयास गर्न जरुरी छ । त्यहि विषयमा आज छलफल हुँदैछ,’ स्रोतले भन्यो ।
छलफलमा नेपालले कोभिडबिरुद्धको खोपको बारेमा पनि कुरा उठाउन सक्ने बताइएको छ । नेपालले भारतको सेरम इस्टिच्युटसंग खरीद सम्झौँता गरेमध्ये १० लाख डोज खोप आउन ढिलाई भएको छ ।
त्यस्तै सेरमसंग थप ५० लाख डोज खरीद गर्ने योजना समेत बनाएको छ । तर भारत आफै संक्रमणको गम्भीर चपेटामा पर्दा नेपाल पठाउने भनिएको खोपमा ढिलाई भएको बताईदै आएको छ ।
सम्पर्क इमेल : [email protected]