काठमाडौँ, ३ जेठ । डा गोविन्द केसीले छ दिन अघि सुरु गरेको आफ्नो २२ औँ अनसन स्थगित गरेका छन् । स्वास्थ्य बिग्रिएर हिजो बेलुका त्रिवि शिक्षण अस्पतालमा भर्ना भएका डा केसीले आज विज्ञप्ती जारी गर्दै अनसन स्थगित भएको जनाएका हुन् ।

यसअघि त्रिवि शिक्षण अस्पतालका चिकित्सकले डा केसीको स्वास्थ्य आइसीयूमा राखेर उपचार गर्नु पर्ने अवस्थामा पुगेको भन्दै अनसनलाई निरन्तरता दिन उचित नहुने सल्लाह दिएका थिए ।

डा केसीले हत्या हिंसाको माध्यमबाट सत्तामा आएका दल र त्यस्तो पृष्टभुमीमा रमेकाहरुले शान्तिपूर्ण अहिंसात्मक सत्याग्रहको माग सुनुवाई गर्छन र शासकहरु संवेदनशील बन्छन् भन्ने कुरा सोच्नु मुर्खता हो भन्दै अनैतिक शासकहरुको अगाडी नागरिकको नैतिक याचना फगत याचनाको रुपमा रहेको भन्दै अनसन स्थगन गरेको जनाएका हुन् ।

डा केसीले प्रधानमन्त्री पुष्पकमल दाहाल प्रचण्डको राजिनामा सहित ४ बुँदे माग अघि सार्दै छ दिन अघि पशुपति मृगस्थलिमा अनसन सुरु गरेका थिए ।