काठमाडौँ, २५ जेठ । आजबाट सुरु भएको कोरोना बिरुद्धको चिनियाँ खोप भेरोसेल काठमाडौँ महानगरपालिका भित्र ८ हजार ७४६ जनाले लगाएका छन् । महानगर भित्रका ३२ वटा वडामा ४ हजार ४१९ जना पुरुष र ४ हजार ३२७ जना महिला गरी कुल ८ हजार ७४६ जनाले भेरोसेल लगाएका हुन् ।

महानगरले आजबाट पाँच दिनसम्म खोप अभियान चलाउने तालिका बनाएको छ । त्यसमा आज ६४ बर्षकाले मात्रै खोप लगाएका हुन् । बुधबार ६३ बर्ष, विहीबार ६२, शुक्रबार ६१ र शनिबार ६० बर्षकालाई खोप लगाउने योजना महानगरको छ । एकैपटक भिड नहुने भएकोले यसरी तालिका मिलाइएको महानगरका स्वास्थ्य प्रमुख हरि कुवरले बताए ।

चीनले अनुदानमा १० लाख डोज खोप दिएपछि सरकारले आज देखि देशव्यापी रुपमा खोप अभियान चलाएको छ । खोप अभियान अन्तरगर्त उपत्यकाका तीन जिल्लामा ६० देखि ६४ बर्ष र उपत्यका बाहिर ६२ देखि ६४ बर्ष उमेर समूहका व्यक्तिलाई खोप दिईदै छ । तिब्बतसंग सिमा जोडिएका जिल्लामा भने १८ देखि माथिका सबै उमेरकालाई दिईने बताइएको छ ।