रगत लिन भन्दै बाहिरिएका श्रीमान फर्केर आएनन्, प्रसूति व्यथाले छट्पटिएकी श्रीमतीको ज्यान गयो
उदयपुर, १६ मंसिर । प्रसूति व्यथा लागेको श्रीमतीका लागि रगत खोज्न भन्दै अस्पतालबाट बाहिरिएका श्रीमान वेपत्ता भएका छन् । यता श्रीमतीको भने मृत्यु भएको छ ।
घटना आइतबार विहानको हो । जिल्ला अस्पताल उदयपुरमा श्रीमतीलाई प्रसूति व्यथा लागेपछि उपचार गर्न आएका प्रेम बुढाथोकी २६ बर्षीया श्रीमती सुष्मालाई लिएर आएका थिए । डाक्टरहरुले श्रीमतीको रगतमा हेमोग्लोविन कम भएकोले तत्काल रगत ल्याउन वा जिल्ला बाहिरको अस्पताल लैजान भनेका थिए । त्यसपछि खर्च खोज्न भन्दै निस्किएका प्रेम फर्केर अस्प्ताल आएनन् । उता अस्पतालमा भने श्रीमतीको ज्यान गयो ।
‘श्रीमतीको रगतमा हेमोग्लोबिन कम भई प्रसूति गराउन खतरा रहेकाले जिल्ला बाहिर लान अथवा छिटो रगत लिएर आउन चिकित्सकले सल्लाह दिएका थियौँ, ल ल भन्दै बाहिरिनु भएको थियो । तर अझै सम्म आउनु भएको छैन,’ जिल्ला अस्पताल उदयपुरका प्रमुख डा विजय मेहताले बताए ।
बुढाथोकी र निजका आफन्तको खोजीमा प्रहरी र अस्पतालका सबै कर्मचारी लागेको अस्पतालका कर्मचारी बताउँछन् । आइतबार बेलुकी मात्र मृतक खोटाङ जिल्ला दिक्तेल मझुवागढी रुपाकोट नगरपालिका दिक्तेलका टङ्कप्रसाद आचार्यकी छोरी भएको खुलेको छ ।
गाईघाट डिएम गेटका कृष्ण राईका अनुसार अनुसार सो दम्पती त्रियुगा नगरपालिका १२ डिएमगेटको एक घरमा डेरा लिएर बस्दै आएको थियो । भागी बिहे गरेको र श्रीमानले श्रीमतीलाई कोठामा राखेर श्रीमान् अन्यत्र बस्ने गरेका कारण स्थानीय छिमेकीले समेत दुवैका बारेमा राम्ररी जानकारी नभएको बताउँछन् ।
नाम थर ठेगानासमेत लुकाएर दुवै गाईघाट बस्दै आएका थिए । प्रेम बुढाथोकी बताउनेले आफ्नो नाम थर र ठेगाना ढाँट्ने गरेका कारण सबै कुरा खुल्न नसकेको डिएमगेटका बासिन्दाको भनाइ छ ।
मृतक सुस्मिता भनिने सुष्मा आचार्य भने टङ्प्रसादकी छोरी भएको खुल्न आएको कारण उनका बुबालाई खबर गरेर बोलाइएको जिल्ला अस्पतालका प्रमुख डा मेहताले बताए ।
सम्पर्क इमेल : nepalihealthnews@gmail.com