काठमाडौँ, १३ साउन । सेवाग्राहीसंग घुस लिएको आरोपमा राष्ट्रिय स्वास्थ्य शिक्षा सुचना तथा सञ्चार केन्द्र, टेकु काठमाडौंका जनस्वास्थ्य अधिकृत (सातौं तह) राम अवतार गुप्ता पक्राउ परेका छन् ।

उनी आज दिउसो बबरमहल स्थित बन विभागको परिसरबाट एक लाख घुस रकम सहित पक्राउ परेका हुन् ।

गुप्ताले सेवाग्राहीसँग जनचेतनामुलक सामग्रिहरु रेडियोमा प्रचारप्रसार गर्न कोटेसन दिई कार्य सम्पन्न गरी भुक्तानि गरे पश्चात कमिशन बापत घुस माग गरीरहेको भन्ने सूचना एवं उजुरीको आधारमा अख्तियारले स्टिङ अप्रेसन गरेको थियो । सोही अप्रेशनमा गुप्ता नगद एक लाख सहित पक्राउ परेका हुन् ।

अख्तियार प्रवक्ता प्रदीपकुमार कोइरालाले गुप्तालाई नियन्त्रणमा लिएर थप अनुसन्धान गरिरहेको बताए ।