काठमाडौँ, ३ साउन । नेपाल चिकित्सक संघको आवहानमा विहीबार वीर अस्पताल, शिक्षण अस्पताल जस्ता ठूला सरकारी अस्पतालको ओपिडी सेवा बन्द भएपनि थापाथलिस्थित प्रसूतिगृह अस्पतालको सेवा भने निर्वाध सूचारु रहेको छ ।

अस्पतालका निर्देशक डा जागेश्वर गौतमले आज पनि हिजो अस्ती जस्तै नियमित रुपमा विरामी जाँच भएको बताए । उनले आज पनि ५ सय बढीको स्वास्थ्य परीक्षण भएको प्रतिक्रिया दिए ।

‘म कहाँ भर्ना हुने विरामी ३० प्रतिशत इमरजेन्सी र ७० प्रतिशत बढी ओपिडीबाट हुन्छन् । त्यसैले बन्द गर्ने कुरा हुँदैन,’ डा गौतमले भने ।
त्यसो त डा गौतमले चिकित्सक संघको बैठकमा समेत आफूले अस्पतालको सेवा कुनै हालतमा बन्द नगर्ने बताएका थिए ।

यता वीर अस्पताल र त्रिवि शिक्षण अस्पतालमा भने विहीबारको ओपिडी ठप्प भएको छ । त्यहाँ केहीलाई आकस्मिक कक्षमा लगेर जाँच गरिएको थियो ।