पोखरा, १२ असोज –  राष्ट्रपति विद्यादेवी भण्डारीले मातृशिशु मितेरी अस्पताल पोखरा र जापानको कोमागाने सहरीबीच भएको भगिनी सम्बन्धको प्रतीक भएको बताएकी छन्् ।

पोखरा उपमहानगरपालिकाको बाटुलेचौरमा सञ्चालन भएको २५ श्ययाको जिल्लास्तरको मातृशिशु मितेरी अस्पतालको यहाँ आज उद्घाटन गर्दै उनले अस्पतालले महिला, बालबालिका र गर्भावस्थामा रहेका शिशुको उपचारमा अत्यावश्यक सेवा पु¥याउने विश्वास व्यक्त गरिन्।

राष्ट्रपति भण्डारीले नेपाल र जापानबीच लामो समयदेखि सुमधुर सम्बन्ध कायम रहेको चर्चा गर्दै जापान नेपालको विकासको एक साझेदार देश भएको धारणा राखिन् ।

प्राकृतिक सौन्दर्य र हिमशृङ्खलाले भरिपूर्ण सुन्दर रमणीय पोखरा पर्यटकको गन्तव्यस्थल भएको चर्चा गर्दै राष्ट्रपति भण्डारीले पोखरालाई स्वास्थ्य पर्यटन सहरका रुपमा विकास गरिनुपर्नेमा जोड दिइन् ।

सो अवसरमा राष्ट्रपति भण्डारीले स्वास्थ्यमन्त्री हुँदा मन्त्रिपरिषद्को बैठकबाट मातृशिशु मितेरी अस्पताललाई २५ श्ययाको जिल्ला अस्पताल बनाउन निर्णायक भूमिका खेलेको भन्दै पूर्वस्वास्थ्यमन्त्री खगराज अधिकारीलाई दोसल्ला ओढाइ सम्मान गरेकी थिइन् ।

सोही समारोहमा उनले अस्पतालको विकासमा उल्लेखनीय योगदान पु¥याउने विभिन्न महानुभावलाई सम्मान गगरेकी थिइन्। सो अवसरमा नेपालका लागि जापानका राजदूत मासासी ओगावाले नवनिर्मित अस्पतालले मातृशिशु मृत्युदर घटाउन सहयोग पु¥याउने बताउँदै जापान सरकारले आगामी दिनमा पनि यसप्रकारका अन्य सहयोग गर्ने जानकारी दिए ।

पूर्वस्वास्थ्यमन्त्री खगराज अधिकारीले नवजात शिशुको मृत्युदर घटाउन नसक्नु अहिले देशका लागि चुतौतीको विषय बनेको धारणा राखे। अस्पताल विकास समितिका अध्यक्ष कृष्ण थापाको अध्यक्षतामा भएको सो कार्यक्रममा जाइका निर्देशक जुन साकुमाले अस्पतालको निर्माणमा सहयोग गर्न पाएकामा खुसी व्यक्त गरे ।

बाटुलेचौर स्वास्थ्य चौकीको स्तरोन्नति र मातृशिशु मितेरी अस्पताललाई समायोजन गरी स्वास्थ्य मन्त्रालयअन्तर्गत जिल्ला अस्पतालका रुपमा सो अस्पताल सञ्चालन गरिएको हो ।

पोखरा उपमहानगरपालिका र जापानको कोमागाने सहरबीच भगिनी सम्बन्ध भएका अवसरमा अस्पताल नेपाल सरकारलाई आज हस्तान्तरण गरिएको हो ।

कोमागाने सहर, नेपाल सरकार र स्थानीय जनसहयोग गरी करिब रु १४ करोड अस्पतालको भवन निर्माण र उपकरण खरिदमा खर्च भएको बताइएको छ । रासस