लण्डन । इङ्ग्ल्याण्डमा रेसिडेन्ट डाक्टरहरूले आगामी अप्रिल महिनामा छ दिन लामो हडताल गर्ने घोषणा गरेका छन् ।

ब्रिटिस मेडिकल एसोसिएसन (बीएमए) र सरकारबीचको बार्ता बिफल भएपछि उनीहरुले ७ अप्रिल देखि हडतालको घोषणा गरेका हुन् ।

उनीहरुले तलव बृद्धि, रोजगारी र कार्य सुविधा सम्वन्धी विषयमा लामो समय देखि उठाउँदै आएका थिए ।

डाक्टरहरूको पेशागत सङ्गठन ब्रिटिस मेडिकल एसोसिएसन (बीएमए) र सरकारबीच लामो समयदेखि जारी वार्ता निष्कर्षमा नपुगेपछि आन्दोलनको घोषणा गरिएको हो ।

अप्रिल ७ देखि हड्ताल, १५औँ पटक आन्दोलन

ब्रिटिस मेडिकल एसोसिएसनका अनुसार हड्ताल अप्रिल ७ तारिख बिहान ७ बजेदेखि सुरु हुनेछ । इस्टर बिदा सकिएलगत्तै सुरु हुने यो आन्दोलन सन् २०२३ मार्चदेखि अहिलेसम्म भएको १५औँ हड्ताल हो । यसपटकको हड्ताल छ दिनसम्म चल्ने भएकाले यो विवादकै सबैभन्दा लामोमध्ये एक मानिएको छ ।

३ दशमलव ५ प्रतिशत तलब वृद्धिमा असन्तुष्टि

सरकारले स्वतन्त्र तलब पुनरावलोकन निकायको सिफारिसअनुसार चालु वर्षका लागि ३ दशमलव ५ प्रतिशत तलब वृद्धि गर्ने निर्णय गरेको छ । तर डाक्टरहरूको सङ्गठनले यसलाई “डाक्टरमाथि गम्भीर धक्का” भन्दै अस्वीकार गरेको छ ।

सरकारका अनुसार पछिल्ला तीन वर्षमा डाक्टरहरूको तलब करिब ३० प्रतिशतसम्म बढाइएको छ । तर सङ्गठनको दाबी छ—महँगीलाई आधार मान्दा सन् २००८ को तुलनामा अहिले पनि रेसिडेन्ट डाक्टरहरूको वास्तविक तलब करिब २० प्रतिशतले घटेको छ ।

तलब संरचना र सुविधा पनि पर्याप्त नभएको गुनासो

हाल रेसिडेन्ट डाक्टरहरूको वार्षिक तलब करिब ३९ हजार पाउण्डबाट सुरु भएर करिब ७४ हजार पाउण्डसम्म पुग्ने व्यवस्था छ । सरकारले परीक्षा शुल्कजस्ता व्यक्तिगत खर्च व्यहोर्ने, तालिमका अवसर बढाउने र तलबको स्तर छिटो बढाउने प्रस्ताव पनि अघि सारेको थियो ।

तर डाक्टरहरूको सङ्गठनले यी व्यवस्थाले मूल समस्या समाधान नगर्ने जनाएको छ ।

महँगी बढ्ने चिन्ता, विदेश पलायनको जोखिम

ब्रिटिस मेडिकल एसोसिएसनका प्रतिनिधि डाक्टर ज्याक फ्लेचरका अनुसार विश्वव्यापी घटनाक्रमका कारण महँगी अझ बढ्ने सम्भावना छ । यस्तो अवस्थामा हालको प्रस्ताव स्वीकार गर्दा डाक्टरहरूको आम्दानी झन् कमजोर हुने र उनीहरू अन्य देशतर्फ जाने क्रम बढ्ने खतरा रहेको उनले बताए ।

सरकारको प्रतिक्रिया : माग यथार्थभन्दा बाहिर

बेलायतका स्वास्थ्य सचिव वेस स्ट्रिटिङले डाक्टरहरूको माग “यथार्थभन्दा बाहिर” रहेको बताएका छन् । उनले सरकारले उपलब्ध सबै उपाय प्रयोग गरेर डाक्टरहरूको काम गर्ने अवस्था सुधार गर्न उदार प्रस्ताव ल्याएको दाबी गरे ।

उनका अनुसार यस्तो प्रस्ताव अस्वीकार हुनु बिरामी र स्वास्थ्यकर्मी दुवैका लागि निराशाजनक हो ।

नेशनल हेल्थ सर्भिस (एनएचएस)मा आधा डाक्टर रेसिडेन्ट

इङ्ग्ल्याण्डमा रेसिडेन्ट डाक्टरहरू नेशनल हेल्थ सर्भिस (एनएचएस) अन्तर्गत काम गर्ने चिकित्सकमध्ये करिब आधा हिस्सा ओगट्छन् । तीमध्ये झण्डै दुई तिहाइ उक्त सङ्गठनका सदस्य रहेका छन् ।

विशेषज्ञ तालिममा रोजगारी अभाव गम्भीर

डाक्टरहरूको सङ्गठनले विशेष गरी तेस्रो वर्षदेखि सुरु हुने विशेषज्ञ तालिममा रोजगारी अभाव गम्भीर समस्या भएको जनाएको छ ।गत वर्ष करिब १० हजार पदका लागि झण्डै ३० हजार आवेदन परेको तथ्याङ्कले प्रतिस्पर्धा अत्यन्त उच्च रहेको देखाउँछ । तीमध्ये केही आवेदन विदेशबाट आएका चिकित्सकहरूको समेत रहेको जनाइएको छ ।

स्वास्थ्य सेवामा असर पर्ने चेतावनी

यो हड्तालका कारण इङ्ग्ल्याण्डको स्वास्थ्य सेवा प्रणालीमा व्यापक असर पर्ने अनुमान गरिएको छ । अस्पतालका नियमित सेवा, शल्यक्रिया, परीक्षण तथा उपचारमा ढिलाइ हुने जोखिम देखिएको छ ।

विशेषज्ञहरूका अनुसार यदि विवाद चाँडै समाधान नभए हड्ताल लम्बिन सक्ने र त्यसले बिरामी सेवामा गम्भीर प्रभाव पार्न सक्नेछ ।