काठमाडौँ, १४ मंसिर । नेपाल फार्मेसी संघले औषधी व्यवसायीहरुले गठन गरेको संघर्ष समितिद्धारा आजका लागि आव्हान भएको औषधी पसल बन्द गर्ने निर्णयको विरोध गरेको छ । संघ उसले आफ्ना सदस्यहरुलाई नियमित रुपमा फार्मेसी सेवा प्रवाह गर्न समेत आग्रह गरेको छ ।

आफ्ना छ बुँदे माग अघि सार्दै संघर्ष समितिले आज देशभर विहान ११ देखि १२ बजेसम्म औषधी पसल बन्द गर्ने घोषणा गरेको थियो ।

फार्मेसी संघका अध्यक्ष युवराज भुसालद्धारा जारी विज्ञप्तीमा फार्मेसी सेवा नागरिकको जीवनरक्षा संग जोडिएको अति सम्वेदनशील क्षेत्र हो भन्दै स्वास्थ्य सेवामा अवरोध हुने गरी बन्द हडताल जन्य कार्य नगर्न सर्बोच्च अदालतले समेत आदेश गरेको कुरा स्मरण गराइएको छ ।

उसले आफ्नो फर्म तथा व्यवसाय समयमै नबीकरण गरी चर्को जरिवाना, आवश्यक झन्झट तथा खारेजी जस्ता जोखिमबाट जोगिन समेत सदस्यहरुलाई आग्रह गरेको छ ।

उसले भनेको छ, ‘नवीकरणका लागि पर्याप्त समय उपलव्ध गराउनु पर्छ । पर्याप्त समय उपलव्ध हुँदा पनि अनन्तकालसम्म नबीकरण नगरी सञ्चालन गर्ने व्यवसायलँई कानून अनुसार दर्ता खारेजी गर्ने अधिकार नेपाल सरकारसंग रहन्छ भन्ने हाम्रो बुझाई हो ।’

संघर्ष समितिले औषधी ऐन २०३५को दफा ११ मा गरिएको संसोधनले ल्याएको नयाँ व्यवस्थाहरुको विरोध गरेको हो । तर संघले सो नयाँ व्यवस्थाको समर्थन गरेको बताएको छ ।