काठमाडौँ, २३ असार । नेपाल चिकित्सक संघले आफ्ना माग पुरा गर्ने विषयमा राज्य पक्षबाट कुनै पहलकदमी नभएको भन्दै भोलि (मंगलबार) पनि देशभरका अस्पतालमा आकस्मिक बाहेकका उपचार सेवा बन्द गर्ने भएको छ ।

बन्दको घोषणासंगै स्वास्थ्य जाँच तथा उपचारका लागि अस्पताल जान खोजेका आम बिरामीलाई समस्या पर्ने देखिएको छ ।

संघका महासचिव डा सञ्जीव तिवारीले आज एक प्रेस विज्ञप्ती जारी गर्दै उपत्यकामा भोलि एघार बजे देखि माईतीघर मण्डलामा प्रदर्शन गर्नै र लाइसेन्स काउन्सिलमा बुझाउने जानकारी दिएका छन् । उनले त्यसका लागि सबै डाक्टरहरुले भोलि बेलुकासम्म इमेल मार्फत प्रमाणपत्र उपलव्ध गराउन भनेका छन् ।

उपभोक्ता संरक्षण ऐन २०७५ को दफा २ मा विभिन्न सेवाहरुको परिभाषा गर्ने क्रममा स्वास्थ्य र चिकित्सकीय सेवाका साथै अन्य सेवालाई पनि समावेश गरिएकोमा उचित संसोधन गर्नुपर्ने नै आफूहरुको प्रमुख माग रहेको संघले बताएको छ ।

यस्तै नेपाल मेडिकल काउन्सिल ऐन २०२० मा निर्दिष्ट प्रावधान अनुसार नेपालमा चिकित्सकीय अभ्यासलाई नियमन गर्ने स्पष्ट क्षेत्राधिकार काउन्सिलको रहेको उल्लेख गर्दै संघले यदि कहि कतै त्रुटी वा लापरवाही भएको कसैलाई लागेमा त्यसको उजुरी बुझ्ने र सो उजुरी उपर स्वास्थ्य सम्वन्धी विज्ञहरुद्धारा आवश्यक छानविन गरी दोषी देखिएमा अदालतद्धारा काउन्सिलको निर्णयलाई आधारमानी फैसला गर्ने चलन रहेको बताएको छ ।

संघले अब पनि सोही व्यवस्थालाई निरन्तरता दिनुपर्ने माग रहेको उल्लेख छ ।

हेर्नुहोस विज्ञप्ती