काठमाडौँ, २३ असार ।  उपभोक्ता अदालतको फैसलाको विरोधमा आन्दोलनमा उत्रिएको नेपाल चिकित्सक संघले भोली पनि आन्दोलनलाई निरन्तरता दिने बताएको छ । पूर्व निर्धारित कार्यक्रम अनुसार चिकित्सकहरुले भोली काउन्सिलमा आफ्नो लाइसेन्स बुझाउँदै छन् ।

संघका अध्यक्ष डा अनिल बिक्रम कार्कीले अस्पतालमा आकस्मिक बाहेकका सेवा बहिस्कारको काम भोली पनि निरन्तर हुने बताए । ‘हामी सेवा बेच्दैनौँ । हामी व्यापारी होईनौँ । आज चिकित्सक नाम दर्ता प्रमाणपत्र संकलन हुँदैछ । भोली काउन्सिलमा बुझाउँछौँ,’ उनले भने ।

‘तपाईँहरुको यो कदमले त बिरामीलाई त मर्का पर्ने भयो नि ?’ भन्ने प्रश्नमा उनले यो समस्या अदालत र कानूनवीदका कारणले आएको भन्दै जिम्मेवारी पनि उनीहरुले नै लिनु पर्ने बताए ।

चिकित्सकको आन्दोलनको कारण आज देशभरका अस्पतालहरुमा आकस्मिक बाहेकका सेवा बन्द छ ।

अस्पताललाई अत्यावश्यक सेवा अन्तरगर्त राखिए पनि सरकारले न हस्तक्षेप गर्न सक्छ । न समस्या सुल्झाउने तिर लागेको छ ।

स्वास्थ्य सचिव डा विकास देवकोटाले कानूनसंग सम्वन्धित विषयमा आफूहरु बोल्न नमिल्ने बताए । उनले आज सेवा रोकिएको जानकारी पाए पनि भोलीबाट सेवा निरन्तर हुनेमा आफू विस्वस्त रहेको बताए ।

यता बन्दको थाहा नै नपाई वीर, त्रिवि शिक्षण अस्पतालमा उपचारका लागि आएका बिरामी भने सेवा बन्द भएको थाहा पाएपछि अलमलमा परेका छन् । कतिपय भने आक्रोशित समेत भएका छन् ।

‘अप्रेसनको पालो मिलाएको हो, आजका लागि भर्नाका लागि बोलाउनु भएको थियो । तर यहाँ त टिकट काट्नै पाइदो रहेनछ,’ त्रिवि शिक्षण अस्पतालमा आएका काभ्रेका एक बिरामीले भने ।

यता वीरमा स्वास्थ्य जाँच गर्न आएकाहरुको पनि गुनासो उस्तै थियो । ‘डाक्टर सावहरु अलि सम्वेदनशील भईदिनु पर्ने हो । कानूनको कुरा माथिबाट नै मिलाउनु पर्ने हो । जनतालाई त गाह्रो भयो नि,’ श्रीमतीलाई लिएर वीर अस्पताल आएका गोरखाका सुनबहादुरले भने । ‘भोलीबाट खुल्छ होला त भनेका छन् के हुने हो कुन्नी’ उनले आशंका व्यक्त गर्दै भने ।

पछिल्लो पटक ओम अस्पताल, हिमाल अस्पताल र ग्राण्डी सिटी अस्पताल र त्यहाँ उपचार गर्ने चिकित्सकको लापरवाहीको कारणले बिरामीको ज्यान गएको भन्दै अदालतले क्षतिपूर्तिको फैसला गरेपछि चिकित्सक तथा अस्पताल सञ्चालकहरु आन्दोलनमा उत्रिएका हुन् । यसमा अरु विभिन्न संस्थाहरुले समर्थन गरेको जनाएका छन् ।