काठमाडौँ, २३ असार । उपभोक्ता अदालतको फैसलाबिरुद्ध चरणवद्ध आन्दोलनमा उत्रिएका चिकित्सक तथा अस्पताल सञ्चालकहरुले आज अस्पतालमा आकस्मिक बाहेकको सेवा रोक्ने भएका छन् ।

कानून संसोधनका लागि दवाव दिन भन्दै उनीहरु सेवा बहिस्कार गर्दै आन्दोलनमा उत्रिएका हुन् । चिकित्सक तथा अस्पताल सञ्चालकहरुको यो कदमले उपचारका लागि अस्पताल आएका बिरामी भने मर्कामा परेका छन् ।

आन्दोलनको नेतृत्व नेपाल चिकित्सक संघले गरेको छ । यद्धपी संघको यो कदम प्रति अरु नौ वटा स्वास्थ्य सम्वद्ध संस्थाको समर्थन रहेको बताइएको छ ।
पछिल्लो समय ओम अस्पताल, हिमाल अस्पताल र ग्राण्डी सिटी अस्पतालबिरुद्ध परेको मुद्धामा अदालतले लापर्वाही ठहर गर्दै अस्पताल र उपचारमा सम्लग्न चिकित्सकमाथि ठूलो परिमाणमा क्षतिपूर्ति तिर्नु पर्ने फैसला सुनाएको थियो । यस्तै यसको विरोधमा लागेका चिकित्सक संघका महासचिव डा सञ्जीव तिवारीलाई अदालतको अवहेलना गरेको मुद्धामा कारण देखाउँ आदेश जारी गरेपछि चिकित्सकहरु थप आक्रोशित भएका हुन् ।

चरणवद्ध आन्दोलन अन्तर्गत हिजो उनीहरुले कालोपट्टी साथ आ आफ्ना अस्पतालमा सेवा रोकेर एक घण्टा धर्ना दिएका थिए । आज आकस्मिक बाहेकका सेवा बहिस्कार गरेका उनीहरुले भोली सामुहिक रुपमा चिकित्सकहरुको लाइसेन्स नेपाल मेडिकल काउन्सिललाई फिर्ता गर्ने बताएका छन् ।
चिकित्सक तथा अस्पतालहरुको यो कदमले उपचार सेवामा थप गतिरोध पैदा हुने देखिएको छ ।

कानून संसोधनलाई दवाव दिन बिरामीको स्वास्थ्य उपचार रोकि बार्गेनिङमा उत्रिएको आरोप लागेको छ । ‘कानूनी कुरा चित्त नबुझे, पुनरावेदन गर्न छुट छ । सरकारलाई दवाव दिन परे अनेक उपायहरु छन्, उपचार सेवा नै बन्द गरेर त चिकित्सकहरुको झन् ठूलो अपराध हुन्छ । उहाँहरुले विकल्प खोज्नु पर्दथ्यो,’ नागरिक अगुवा श्याममणि अधिकारीले भने ।

यता चिकित्सकहरु भने, ‘आकस्मिक परेको खण्डमा अस्पतालमा उपचार सेवा लिन सकिने भन्दै नियमित सेवा मात्रै रोकिएको बताउँछन् । हामीले उपचार सेवा दिने हो, ग्यारेन्टी दिन सकिदैन । तर अदालतले यसरी कार्वाही गर्दै जाने हो भने उपचार सेवा कसरी दिनु ?,’ संघका महासचिव डा तिवारी भन्छन्, ‘सरकारले यसबारेमा गम्भीर ढंगले सोच्नु पर्दछ ।’

यता उपभोक्ता हित संरक्षण मञ्चले चिकित्सक तथा अस्पताल सञ्चालकहरु सेवा नै बन्द गरी आन्दोलनमा उत्रिएको भन्दै प्रधानमन्त्रीको ध्यानाकर्षण गराएको छ । उसले कानून बिपरित स्वास्थ्य सेवा रोकिएको भन्दै यसमा लाग्नेहरुको पहिचान गरि कार्वाही गर्न माग गरेको छ ।

पछिल्लो समय चिकित्सक संघका हरेक आन्दोलनमा अस्पताल बन्दबाट अछुतो बनेको छैन । यसले चिकित्सक र बिरामीबीच झन् द्धन्द बढाएको छ । सरोकारवालाहरुले दवाव दिने नाममा सेवा नै रोक्ने कदम नचाली विकल्प खोज्न बताउँदै आएका छन् ।