काठमाडौँ, ३ जेठ । स्वास्थ्य पत्रकार कल्पना आचार्यले यसवर्षको रोटरी जर्नो अवार्ड प्राप्त गरेकी छन् । हेल्थ टिभी अनलाइनकी सम्पादक तथा स्वास्थ्य पत्रकार मञ्चकी पूर्व अध्यक्ष आचार्यलाई रोटरी इन्टरनेशनल डिस्ट्रिक्ट ३२९२ ले यस वर्षको स्वास्थ्य विधा तर्फको अवार्ड प्रदान गरेको हो ।

शनिबार राजधानीमा आयोजित कार्यक्रममा रोटरी इन्टरनेशनल डिस्ट्रिक्ट ३२९२ का डिस्ट्रिक्ट गभर्नर राजेन्द्र मान शेरचन लगायतका पदाधिकारीले नगद ५१ हजार तथा कदरपत्रबाट उनलाई सम्मान गरे।

स्वास्थ्य क्षेत्रमा रोगको रोकथाम र उपचारका क्षेत्रमा जनचेतना फैलाउन दुई दशकदेखि गरेको योगदानको कदर गर्दै आचार्यलाई उक्त अवार्ड प्रदान गरिएको हो ।

यसैगरी पुरस्कार पाउनेहरुमा शिक्षातर्फबाट नारायण किलम्बु, आर्थिक तथा सामुदायिक विकासतर्फ पवन वर्षा शाह, पानी तथा सरसफाई विधा तर्फ सागर परियार, मातृ तथा शिशु स्वास्थ्यतर्फ अनिता भेटवाल, शान्ति तथा द्धन्द रोकथामतर्फ उन्नती चौधरी र स्वतन्त्रतर्फबाट विकास रौनियार रहेका छन्।

यसैगरी रोटरी लाईफ टाईम एचिभमेन्ट अवार्ड वरिष्ठ पत्रकार भारतदत्त कोइरालालाई प्रदान गरिएको छ ।