काठमाडौँ, ६ पुस । सर्बोच्च अदालतले स्वास्थ्य बीमा बोर्डका कार्यकारी निर्देशक डा दामोदर बसौलालाई निलम्बन गर्ने निर्णय कार्यान्वयन नगर्न सरकारका नाममा अन्तरिम आदेश जारी गरेको छ । गत २६ कात्तिकमा स्वास्थ्य मन्त्री मोहनबहादुर बस्नेतले विभिन्न आरोप लगाउँदै तीन महिनाका लागि निलम्बन गर्ने निर्णय गरेका थिए ।

सो विरुद्ध डा बसौला १७ कात्तिकमा सर्बोच्च गएका थिए ।

शुक्रबार न्यायाधीशद्धय हरिप्रसाद फुयाल र सुनीलकुमार फुयालको संयुक्त इजलासले  कार्यकारी निर्देशक डा. बसौलालाई निलम्बन गर्ने निर्णय कार्यान्वयन नगर्न अन्तरिम आदेश जारी गरेको हो ।

पछिल्लो समय स्वास्थ्य मन्त्री बस्नेतले गरेका प्राय सबै निर्णयहरु सर्बोच्चले उल्ट्याइदिएको छ ।

यसले मन्त्री बस्नेतका धेरै निर्णयहरु पक्षपातपूर्ण र हचुवाका भरमा कानूनविपरित भएका छन् भन्नेहरुहरुको अभिव्यक्तिमा बल पुगेको छ ।