काठमाडौँ, २४ चैत । सुर्खेतस्थित प्रदेश अस्पताल ३ सय बेडमा स्तरोन्नती हुने भएको छ । शनिबार बसेको कर्णाली प्रदेश सरकारको मन्त्रिपरिषद बैठकले ५० बेडको सो अस्पताललाई शिक्षण अभ्यास समेत हुने गरी ३ सय बेडमा स्तरोन्नती गर्ने निर्णय गरेका हो ।

पहिलेको मध्यपश्चिम क्षेत्रीय अस्पताल सुर्खेतलाई पछि प्रदेश अस्पतालमा रुपान्तरण गरिएको थियो । ५० बेडको सोही अस्पताललाई अहिले ३ सय बेडमा स्तरोन्नती गर्ने निर्णय भएको प्रदेशका आन्तरिक मामिला तथा कानुनमन्त्री नरेश भण्डारीले जानकारी दिए।

कर्णाली प्रदेशका सामाजिक विकास मन्त्री दल रावलले शिक्षण अभ्यास सहितको ३ सय बेडको  प्रेशण (रेफरल) अस्पतालको रुपमा  स्तरोन्नती गर्ने निर्णय भएको बताए । ‘अब प्रदेशलाई  विशेषज्ञ सेवा दिने एउटा रेफरल अस्पतालको रुपमा अघि बढाउँदै छौँ । यसले कर्णाली क्षेत्रका बासिन्दालाई विशेषज्ञ सेवा लिन नेपालगञ्ज र काठमाडौँ जानुपर्ने बाध्यताको अन्त्य हुनसक्छ,’ मन्त्री रावलले भने ।

यसैबीच सो बैठकले प्रदेश २ का हावाहुरी प्रभावितका लागि राहतस्वरुप १ करोड रुपैयाँ सहयोग गर्ने समेत निर्णय गरेको छ।

प्रदेश २ को मुख्यमन्त्री राहत कोषमा जम्मा हुने गरी १ करोड उपलब्ध गराउने निर्णय गरेको हो।