काठमाडौँ, ३१ बैशाख – चिकित्सा शिक्षा आयोगले सरकारलाई बुझाएको एकीकृत चिकित्सा शिक्षा ऐनको मस्यौँदा प्रति एशोसिएसन अफ प्राइभेट मेडिकल एण्ड डेन्टल कलेज अफ नेपालले आपत्ति जनाएको छ ।

उसले आयोगले बुझाएको मस्यौदा स्वदेशी मेडिकल कलेज बन्द गर्ने र विदेशी मेडिकल कलेजलाई प्रोत्साहन गर्ने खालको भएको आरोप लगाएको छ ।आयोगले हिजो मात्रै प्रधानमन्त्री केपी शर्मा ओलीलाई मस्यौैदा बुझाएको थियो ।

एसोसिएसनका अध्यक्ष डा भोला रिजालद्धारा शुक्रबार विज्ञप्तीमा आयोगका पदाधिकारीहरुले विज्ञ र सरोकारवासंग कुनै छलफल नगरी हचुवाको भरमा एकपक्षीय ढंगले प्रतिवेदन सरकारलाई बुझाएको आरोप लगाइएको छ । उसले आयोग गठन प्रक्रियासमेत गलत भएको दावी गरेको छ ।

“समिति गठन प्रक्रिया देखिनै हामीले पटक पटक विरोध स्वरुप सम्बन्धित निकाय माझ समिति स्वच्छ र निस्पक्ष नभएको र विधेयकमा उल्लेखित अधिकांस बुदाहरुमा पुनरावलोकन गर्नुपर्छ भनेर जानकारी गराउँदै आएको कुरा सर्वबिदितै छ तर त्यसको बेवास्ता गरि हचुवाको भरमा प्रतिवेदन बुझाएको छ । यसमा हाम्रो घोर आपत्ती प्रकट गर्दछौँ” प्रतिवेदनमा भनिएको छ ।

एसोसियसनले अहिलेको प्रतिवेदन पुनरावलोकन नगरिए नेपाली विद्यार्थीलाई स्वदेशमा अध्ययन गर्न पाउने उनीहरुको नैसर्गिक अधिकारलाई बन्चित गर्ने र अर्बौँ रुपैया नेपाल बाहिर जाने दावी गरेको छ । उनले हिजो बुझाएको मस्यौदा विदेशी मेडिकल कलेजहरुलाई प्रोत्साहन गर्ने उदेश्यले प्रेरित रहेको भन्दै आफुहरुलाई कुनैपनि कोणबाट मान्य नहुने बताएको छ ।