दिनभरको थकान मेटेर शरीर र मस्तिष्कलाई ताजा राख्न पर्याप्त र गुणस्तरीय निद्रा अत्यन्त आवश्यक छ । तर बदलिँदो जीवनशैली, तनाव र प्रविधिको अत्यधिक प्रयोगका कारण धेरै मानिस निद्रासम्बन्धी समस्याबाट प्रभावित भइरहेका छन्।

यदि तपाईं पनि राति राम्रोसँग सुत्न सक्नुहुन्न भने, मिठो र आरामदायी निद्राका लागि यी तीन सरल तर प्रभावकारी टिप्स उपयोगी हुन सक्छन्।

१. सुत्ने र उठ्ने समय नियमित बनाउनुहोस्

हरेक दिन सकेसम्म एउटै समयमा सुत्ने र उठ्ने बानी बसाल्दा शरीरको जैविक घडी (बडि क्लक) सन्तुलित हुन्छ। साताको अन्तिम दिन भनेर शुक्रबार वा शनिबार मज्जाले सुत्ने गर्नुहुन्छ तर त्यसो नगर्नु होला । सप्ताहन्तमा पनि सुत्ने र उठ्ने समय धेरै नबदल्नु राम्रो मानिन्छ ।

२. सुत्नुअघि मोबाइल र स्क्रिनको प्रयोग कम गर्नुहोस्

मोबाइल, ट्याबलेट, टिभी वा कम्प्युटरबाट निस्कने नीलो प्रकाशले निद्रा ल्याउने हर्मोन (मेलाटोनिन) को उत्पादन घटाउन सक्छ। सुत्नुभन्दा कम्तीमा ३०–६० मिनेटअघि स्क्रिनबाट टाढा रहनु उपयुक्त हुन्छ।

३. चिया/कफी र राती ढिलो गरी धेरै खाना नखानुहोस्

क्याफिनयुक्त पेय पदार्थ र धेरै मसलेदार वा सुत्नु अघिको धेरै खानाले पनि निद्रामा बाधा पर्न सक्छ। बेलुकी हल्का खाना खाने र सुत्नुअघि धेरै पानी नपिउने बानी आरामदायी निद्राका लागि लाभदायक हुन्छ।

यसबाहेक सुत्ने कोठा शान्त, अँध्यारो र आरामदायी तापक्रममा राख्न सके निद्रा अझ राम्रो हुन सक्छ। नियमित शारीरिक व्यायामले पनि निद्राको गुणस्तर सुधार्न मद्दत गर्छ।