काठमाडौँ, ९ बैशाख । औषधी व्यवस्था विभागका तत्कालिन महानिर्देशक नारायणप्रसाद ढकालले प्रचलित कानूनले तोकेको प्रक्रिया पुरा नगरी औषधीको मूल्य बढाएको भन्ने आरोपको सम्वन्धमा छानविन गर्न प्रधानमन्त्री तथा मन्त्रिपरिषद्को कार्यालयबाट उच्चस्तरीय नयाँ समिति गठन भएको छ ।

स्वास्थ्य तथा जनसंख्या मन्त्रालय स्रोतका अनुसार औषधी विज्ञ समेत रहेका प्राडा बालमुकुन्द रेग्मीको संयोजकत्वमा पाँच सदस्यीय समिति गठन भएको हो । सो समितिले केही दिन अघि बाट नै काम सुरु गरेको बुझिएको छ ।

यसअघि २६ चैतमा स्वास्थ्य मन्त्री निशा मेहताले मन्त्रीस्तरीय निर्णय गर्दै अतिरिक्त स्वास्थ्य सचिव डा श्रीकृष्ण श्रेष्ठको संयोजकत्वमा तीन सदस्यीय छानविन समिति गठन गरेकी थिईन ।

प्रधानमन्त्री तथा मन्त्रिपरिषद्को कार्यालयबाट आएको निर्देशन पछि गठित उक्त समितिलाई छानविन गरी ७ दिन भित्र प्रतिवेदन बुझाउन भनिएको थियो । तर सो अवधीसम्म उक्त समितिलाई कार्यारम्भ गर्न पत्र नै दिइएन ।

• सात दिनमा रिपोर्ट दिनु भन्ने समितिलाई १० दिनसम्म कार्यादेश नै दिइएन

‘पुरानो समितिका कतिपय सदस्यहरु सो कामका उपयुक्त नभएको भन्ने गुनासो आएको, कतिपय सदस्यहरु समितिमा बस्न नचाहेको र अलमल गरेको जस्तो देखिएपछि प्रधानमन्त्री कार्यालयबाट नै शक्तिशाली समिति गठन भएको हो । काम एकदमै गोप्य ढंगले तिब्रगतिमा बढाइएको छ । केही दिनमै रिपोर्ट सार्वजनिक हुन्छ । प्रधानमन्त्री कार्यालय अहिले समितिमा को को छन् भनेर  समेत सार्वजनिक गर्ने पक्षमा छैन,’ स्रोतले भन्यो ।

यसअघि गत २४ चैतको प्रतिनिधि सभा बैठकमा सांसद राजीव खत्रीले विभागका महानिर्देशक ढकालको नाम नै किटान गरी प्रचलित कानूनी प्रक्रिया पुरा नगरी औषधीको मूल्य बृद्धि गरेको र सो क्रममा अर्बौ रकमको अपचलन भएको ठोकुवा गरेका थिए ।

खत्रीले संसदमा चर्को रुपमा विषय प्रवेश गराएपछि प्रधानमन्त्री तथा मन्त्रिपरिषद्को कार्यालयले २६ चैत विहान महानिर्देशक ढकाल र खत्रीलाई बोलाई सोधपुछ गरेको थियो ।

सोही दिन दिउसो स्वास्थ्य मन्त्री मेहताले ढकाललाई विभागको महानिर्देशको भूमिकाबाट हटाई मन्त्रालयमा हाजिर हुन पत्राचार गरेकी थिईन । विभागको नेतृत्व भने अहिले निमित्त महानिर्देशक बनेर शिवानी खड्गीले सम्हालेकी छन् ।