काठमाडौँ, १३ मंसिर । नेपाल एनसीडी एलायन्सको तेस्रो बार्षिक साधारण सभा सम्पन्न भएको छ ।

एलायन्सका अध्यक्ष डा प्रकाशराज रेग्मीको अध्यक्षतामा शनिबार काठमाडौँमा आयोजित साधारणसभाले नसर्ने रोग रोकथाम तथा न्युनिकरणका लागि थप प्रभावकारी योजनाका साथ अघि बढ्ने निर्णय गरेको छ ।

त्यसअघि बोल्दै डा रेग्मीले नसर्ने रोगको बढ्दो प्रकोप न्युनिकरणका लागि सचेतनाको कार्यक्रम आवश्यक रहेको बताए । ‘अस्वस्थकर खानपान, बदलिदो जीवनशैलीका कारण नसर्ने रोगको जोखिम बढ्दो छ । यसलाई न्युनिकरण गर्नका लागि व्यक्तिको व्यवहार परिवर्तन गर्नु पर्ने छ । त्यसका लागि व्यक्ति व्यक्ति सचेत हुन जरुरी छ । एलायन्सयले यी विषयलाई मध्यनजर गर्दै आवश्यक रणनीति र कार्यनीति बनाई काम गर्नेछ,’ उनले भने ।

साधारणसभामा एलायन्सका महासचिव किशोरकुमार प्रधानांङ्ग र कोषाध्यक्ष उत्तमा श्रेष्ठले क्रमश सांगठनिक र आर्थिक प्रतिवेदन पेश गरेका थिए । सभाले दुबै प्रतिवेदनलाई अनुमोदन गरेको छ ।

कार्यक्रममा संगठनका सह अध्यक्ष शान्तलाल मुल्मी, उपाध्यक्ष प्राडा अभिनव वैद्य, सदस्य शिव श्रेष्ठ, सरोज ढुंगेल, रामप्रसाद न्यौपानेले लगायतले आफ्ना धारणा राखेका थिए । यस्तै सेरो एनसीडी एलायन्सको एड्भोकेसी प्लानबारेमा डा मनिता प्याकुरेलले प्रस्तुति दिएकी थिईन् ।

सन् २०१३ मा लुज नेटवर्कको रुपमा स्थापित भएको नेपाल एनसीडी एलायन्स सन् २०२२ देखि विधिवत रुपमा दर्ता भई आफ्ना कामहरु गर्दै आएको छ ।