काठमाडौँ, १३ मंसिर । छ बुँदे माग अघि सार्दै आन्दोलनमा उत्रिएका औषधी व्यवसायीहरुले आइतबार (भोली) एक घण्टा औषधी पसल बन्द गर्ने घोषणा गरेका छन् ।

उनीहरुले विहान ११ बजे देखि १२ बजेसम्म औषधीको आयात, थोक र खुद्रा पसल बन्द गरि विरोध जनाउने भएका हुन् । काठमाडौँमा भएका व्यवसायीहरुले सो समयमा औषधी व्यवस्था विभाग पुगेर धर्ना दिने बताएका छन् ।

नेपाल औषधी व्यवसायी संघ, नेपाल आयुर्वेद औषधी व्यवसायी संघ, नेपाल पशुपक्षी औषधी व्यवसायी संघले गठन गरेको संयुक्त संघर्ष समितिमा नेपाल औषधी आयातकर्ता संघले पनि समर्थन गरेको छ । समितिले औषधी ऐन २०३५ को दफा ११ को उपदफा ३ लाई पूर्ण संशोधन र उपदफा ५ को खारेजी हुनु मुख्य माग राखेका छन् ।

त्यसो त गत विहीबार स्वास्थ्य तथा जनसंख्या मन्त्रालय र आन्दोलनरत व्यवसायीबीच बार्ता भएको थियो । स्वास्थ्य सचिवसंग भएको बार्ता सकारात्मक रुपमा अघि बढेको बताए पनि व्यवसायीहरुले त्यसबेला नै आन्दोलनलाई निरन्तरता दिने घोषणा गरेका थिए ।

संघर्ष समितिका संयोजक श्रीधर खनालले पेशागत भविस्य सुनिश्चित गर्न तथा भविस्यमा आईपर्न सक्ने गम्भीर व्यवसायिक समस्या निराकरणका लागि आन्दोलनलाई सशक्त बनाउन लागिएको भन्दै बन्द र प्रदर्शनलाई एक साथ अघि बढाइएको बताए ।

उनले जारी गरेको विज्ञप्तीमा ‘मंसिर १४ गते बिहान ११ देखि १२ बजेसम्म आ आफ्नो औषधी पसल (फार्मेसी) बन्द गरी, देशैभरिका सम्पूर्ण आयात, थोक र खुद्रा व्यवसायीहरूलाई पायक पर्ने औषधि व्यवस्था विभागको केन्द्रीय कार्यालय, शाखा कार्यालय, सम्बन्धित निकाय वा स्थानीय प्रशासन कार्यालयको प्राङ्गणमा अनिवार्य उपस्थितिको लागि हार्दिक अनुरोध गर्दछौं,’ भनिएको छ ।

औषधी बिक्री सेवा रोक्ने कार्य कानून विपरित

औषधी व्यवसायीहरुले आफ्ना माग पुरा गराउन धर्नाका साथै एक घण्टा विक्री बितरण ठप्प पार्ने घोषणा गरेका छन् । तर यो घोषणा कानून विपरित छ ।

सरकारले जारी गरेको आवश्यक सेवा सञ्चालन ऐन २०१४ ले औषधी निर्माण तथा विक्री बितरण रोक्ने गरी आन्दोलन गर्न नपाईने स्पष्ट पारेको छ ।

बिरामीको लागि अत्यावश्यक औषधीहरु समयमै उपलव्ध नहुँदा त्यसले अफ्टेरो पार्न सक्छ । तर नेपालमा माग पुरा गराउन दवाव दिनका लागि बन्दलाई रोज्ने चलन छ । यसअघि चिकित्सा सेवाका लागि चिकित्सकहरुले अनि नर्सिङ सेवामा नर्सहरुले आवश्यक सेवा भुलेर आन्दोलन गरेका थिए । यसपटक सोही तरिका औषधी व्यवसायीहरुले थालेका छन् ।

संघर्ष समितिका संयोजक खनालले औषधीको विक्री बितरण बन्द गर्नु कानून विपरितको कार्य हो भन्ने थाहा हुँदा हुँदै बाध्यतावस आफूहरुले सो कदम चालेको प्रतिक्रिया दिएका छन् । ‘बन्द गर्न पाईदैन भन्ने त थाहा नै छ, तर हामीलाई पसल खोल्ने र व्यवसाय गर्ने बातावरण नै नहुने भएपछि अर्को विकल्प नै रहेन । पसलै नरहने, व्यवसाय नै गर्न नपाईने अवस्था भएपछि के गर्ने त ?’ उनले पहिलो दिन भोली एक घण्टा मात्रै हुने भएकोले बिरामीहरुलाई धेरै असर नहुने ठोकुवा गरे ।

माग पुरा नभए क्रमश हरेक दिन एक घण्टाका दरले बन्दको समयसिमा थप्दै जाने पनि उनले बताए ।

• औषधी व्यवसायी र मन्त्रालयबीचको बार्ता सकारात्मक तर आन्दोलन यथावत