काठमाडौँ, १४ कात्तिक । आन्दोलनरत नर्सको मागका सम्वन्धमा स्वास्थ्य तथा जनसंख्या मन्त्रालयमा आज बेलुका बसेको ‘निर्णायक बार्ता’ भोली पुन: बस्ने गरी टुंगिएको छ । यद्धपी बार्ता सकारात्मक रुपमा अघि बढेको बताइएको छ ।

स्रोतका अनुसार स्वास्थ्य मन्त्री डा. सुधा शर्मा, सचिवद्धय डा. विकास देवकोटा र डिल्लीराम शर्मा समेतको उपस्थितिमा भएको बार्तामा बेलुकाको बार्ता सहमति नजिक नजिक पुगेको छ ।

स्वास्थ्य मन्त्री शर्माले सहमतिमा पुग्नका लागि राखेको प्रस्तावमा आन्दोलनरत नर्स, नर्सिङ संघका प्रतिनिधि लगायतले समर्थन जनाएका थिए । तर, निजी मेडिकल तथा डेन्टल कलेज एसोसिएसनका तर्फबाट सहभागी प्रतिनिधिले आफ्नो सदस्यहरुसंग थप छलफल गर्नु पर्ने बताएपछि शनिबार विहान साढे १० बजे पुन:  बस्ने गरी आजको बार्ता सकिएको हो ।

‘आज अलि अबेला पनि भयो, केही सरोकारवालाले थप छलफल गर्नु समय माग गर्नु भयो । त्यसैले बार्ता भोली साढे १० बजे पुन: मन्त्रालयमा बस्ने गरी टुंगिएको छ । र अहिले सकारात्मक रुपमा अघि बढेको छ,’ मन्त्रालयका प्रवक्ता डा. प्रकाश बुढाथोकीले भने ।

सरकारी सरह तलव सुविधा माग गर्दै आन्दोलनमा उत्रिएका नर्सहरुको माग तत्काल सम्वोधन गर्न प्रधानमन्त्री सुशीला कार्कीले स्वास्थ्यका अतिरिक्त सचिव डा. श्रीकृष्ण श्रेष्ठको संयोजकत्वमा १४ सदस्यीय समिति गठन गरेकी थिईन् । सो समितिको बैठक आज विहान र बेलुका दुई पटक बसेको थियो ।