काठमाडौँ, १८ वैशाख । कर्णाली प्रदेशको सामाजिक विकास मन्त्रीमा वीरबहादुर शाही नियुक्त भएका छन् ।

कर्णाली प्रदेशका मुख्यमन्त्री यामलाल कँडेलले मंगलबार सरकार विस्तार गर्दै माओवादीका तर्फबाट शाहीलाई सामाजिक विकास मन्त्रीमा नियुक्त गरेका हुन् । उनले  माओवादीका ३ र एमालेका २ जना  र एक जनालाई राज्यमन्त्री नियुक्त गरेका छन् ।

मुख्यमन्त्री कँडेलले माओवादीबाट कालिकोटका दुर्गबहादुर रावतलाई उद्योग वन तथा पर्यटन मन्त्रालयको जिम्मेवारी दिएका छन् । रुकुम पश्चिमका महेन्द्र केसीलाई आर्थिक मामिला मन्त्रालयको जिम्मेवारी दिएका छन् ।

यस्तै यसअघि बिना विभागीय मन्त्रीको रुपमा शपथ लिएका रणसिंह परियारले उर्जा मन्त्रालयको जिम्मेवारी पाएका छन् ।

मुख्यमन्त्री कँडेलले एमालेबाट भौतिक पूर्वाधार तथा सहरी विकास मन्त्रीमा शेरबहादुर बुढा, भूमि, व्यवस्था, कृषि तथा सहकारी मन्त्रीमा विनोद कुमार शाहलाई नियुक्त गरेका छन् । उनले सांसद गोमता विकलाई भौतिक राज्यमन्त्री बनाएका छन् । आन्तरिक मामिला तथा कानुन मन्त्रालय मुख्यमन्त्री कँडेल आफैंले राखेका छन्

उनीहरूलाई प्रदेश प्रमुख तिलक परियारले पद तथा गोपनीयताको शपथ गराएका छन् ।