आनन्द वनमा डढेलो फैलिएपछि कुष्ठरोग अस्पताल जोखिममा, बिरामी अन्यत्र सारियो
काठमाडौँ, १८ वैशाख । ललितपुरको गोदावरी स्थित लेले जङ्गलमा ३–४ दिनदेखि लागेको डढेलो आनन्द वनमा पनि फैलिएको छ ।
ललितपुरको गोदावरी नगरपालिका–६ स्थित आनन्द वनमा लागेको डढेलो फैलिएपछि त्यहाँ नजिकै रहेको कुष्ठरोग अस्पतालमा रहेका ९३ जना बिरामी अन्यत्र सारिएको छ ।
जिल्ला प्रहरी परिसर ललितपुरका प्रवक्ता एसपी नरेशराज सुवेदीले आगो नियन्त्रणका लागि सेना, सशस्त्र, नेपाल प्रहरी, अग्नि नियन्त्रकसहितको टोली परिचालन गरिएको बताएका छन् ।
त्यस्तै ललितपुरको गोदवारी नगरपालिका–४ स्थिति तपेश्वर सामुदायिक वनमा लागेको डढेलो निभाउने क्रममा दुईजना घाइते भएका छन् ।
प्रहरीका अनुसार घाइते हुनेहरूमा शङ्कर पहरी र रमेश पहरी रहेका छन् । उनीहरूलाई उपचारको लागि कीर्तिपुरस्थित बर्न अस्पतालमा पठाइएको एसपी सुवेदीले बताए । उनका अनुसार एकको अवस्था गम्भीर छ।
सम्पर्क इमेल : [email protected]