काठमाडौँ, २६ माघ । सरकारले ‘रामराजा प्रसाद सिंह स्वास्थ्य विज्ञान प्रतिष्ठान’को पूर्वाधार विकास समितिको अध्यक्षमा डा. परशुराम मिश्रलाई नियुक्त गरेको छ ।

स्वास्थ्य तथा जनसंख्या मन्त्रालयको प्रस्तावमा बिहीबार बसेको मन्त्री परिषद्को बैठकले डा. मिश्रलाई अध्यक्षमा नियुक्त गर्ने निर्णय गरेको हो।

यसअघि गत ४ माघमा बसेको मन्त्रिपरिषद्को बैठकले रामराजा प्रसाद सिंह स्वास्थ्य विज्ञान प्रतिष्ठान पूर्व तयारी विकास समिति (गठन) आदेश २०८० स्वीकृत गर्ने निर्णय गरेको थियो ।

सप्तरीमा प्रतिष्ठान स्थापना गरी सञ्चालनमा ल्याउने भन्ने विषयको निर्णय भने २३ पुस २०७५ मा बसेको मन्त्रिपरिषद्को बैठकले गरेको थियो । त्यस निर्णयपछि पूर्वाधार निर्माण गर्न राजविराज नगरपालिका-१०, स्थित बिरौलमा ६२ बिगाह जग्गा खोजिएको छ।

संघीय सरकारको स्वास्थ्य तथा जनसंख्या मन्त्रालयद्वारा गठित ‘रामराजाप्रसाद सिंह स्वास्थ्य विज्ञान प्रतिष्ठान सुझाव समिति’ले ०७६ बैशाखमा प्रतिष्ठान निर्माणस्थलको स्थलगत निरीक्षण गरेको थियो।