सङ्खुवासभा, १७ पुस । सङ्खुवासभा जिल्ला अस्पतालमा सिवियर निमोनियाको एक बिरामीलाई १८ दिनसम्म भेन्टिलेटरमा राखेर उपचार गरिएको छ। सिवियर निमोनियाबाट पीडित भोजपुर तुङ्गेछा निवासी अर्पना जोगीलाई अस्पतालको भेन्टिलेटरमा राखेर उपचार गरिएको बाल रोग विशेषज्ञ दीपेन्द्र राईले बताए ।

विद्यालयबाट घर फर्कंदै गर्दा अर्पनाको कोखा हान्न थालेकाले आतिएका अभिभावकले स्थानीय स्वाथ्यकर्मीको सल्लाहअनुसार खाँदबारीस्थित उक्त अस्पताल लिएर आएका थिए। उनलाई सिवियर निमोनियाको लक्षण देखिएकाले १८ दिनसम्म भेन्टिलेटरमा राखेर उपचार गरी ३० दिनको अस्पताल बसाईंपछि आज घर फर्काइएको उनले जानकारी दिए ।

यसअघि कात्तिक तेस्रो हप्ता चिचिला गाउँपालिकाकी सरस्वती राईलाई पनि खेल्दाखैल्दै श्वास फेर्न गाह्रो हुन लागेकाले अभिभावकले खाँदबारी अपस्पतालमा लिएर आएका थिए। जिल्ला अस्पतालको आकस्मिक कक्षमा भर्ना भएकी अर्पनालाई जाँच गर्दा सिवियर भएको बाल विशेषज्ञ राईले बताए ।

त्यसपछि उनलाई तत्काल भर्ना गरेर सघन उपचार कक्षमा राखि उपचार गर्न थालियो। सिवियर निमोनिया भएपछि बच्चालाई श्वासप्रश्वासमा समस्या हुने कोखा हान्नेजस्ता लक्ष्यण देखापर्ने, बच्चा सुस्त हुने अक्सिजनको कमी भएर शरीर निलो देखिन थाल्छ। यस्तो लक्ष्यण देखिनासाथ बच्चालाई अस्पताल लगेर विशेषज्ञलाई देखाउनुपर्ने हुन्छ ।

अस्पताल आउन ढिला भए हातखुट्टामा कम्पन आउने, मुटुको गति कम हुने, पिसाब कम आउने र अन्त्यमा बिरामीको मृत्युसमेत हुनसक्ने विशेषज्ञ राईले बताए । सरस्वती र अर्पनाका अभिभावकको आर्थिक अवस्था कमजोर रहेको हुनाले उनीहरुलाई खाँदबारी अस्पतालमा उपचार हुँदैन कि भनेर चिन्ता थियो तर उक्त अस्पतालले पछिल्लो समयमा सुरु गरेको सघन उपचार कक्ष र विशेषज्ञको सेवाले यही उपचार सम्भव तुल्यायो ।

ती बिरामीलाई अस्पतालले निःशुल्क उपचार गरेको छ। अस्पताल व्यवस्थापन समितिका अध्यक्ष सुमन शाक्यले सामाजिक इकाइ सेवाबाट आर्थिक अवस्था कमजोर भएकाका लागि सहयोग गर्ने हुनाले उनीहरुलाई अस्पतालले छुट दिएको बताए ।

रासस