परजिवीबाट संक्रमित लामखुट्टेको टोकाईबाट सर्ने हात्तीपाईले रोग निबारणको लागि बि.सं. २०७२ को आम औषधि सेवन गराउने कार्य तालिम प्राप्त स्वास्थ्यकर्मी तथा स्वास्थ्य स्वयंसेवकहरुबाट सम्पन्न हुदैछ । यस अभियानमा खुवाईने दुई थरी औषधिले रोगको उपचार हुनुको साथसाथै रोग लाग्नबाट समेत बचाउने हुनाले यीे औषधिहरु सेवन गर्नु आवश्यक छ । यी दुबै औषधिहरु वर्षौंदेखि उपचारको लागि प्रयोगमा आइरहेको र सुरक्षित औषधि हुन् । विश्वभर अरवौं मात्रा र नेपालमा हालसम्म पटक पटक गरी ९ करोड भन्दा बढी मात्रा औषधि सेवन भई सकेको छ ।
हात्तीपाईलेको औषधि दुई वर्ष नपुगेका केटाकेटीहरू, गर्भवती र ७ दिन सम्मका सुत्केरी, छारे रोगी तथा सिकिस्त विरामीहरुले खानु हुँदैन । यो औषधि खाली पेटमा खानु हुँदैन । अरु सबै ब्यक्तिले स्वास्थ्यकर्मी तथा स्वास्थ्य स्वयंसेवकहरुले भने अनुसार खाना सँगै वा खाना पछि औषधि खानु पर्दछ ।
औषधिको सेवन गरे पछि हात्तीपाईलेको परजिवी शरिरमा भएका केही व्यक्तिहरुमा ज्वरो आए जस्तो हुने, टाउको दुख्ने, रिङ्गटा लाग्ने, वाक-वाकी लाग्ने जस्ता सामान्य असर हुन सक्दछ । यस्ता असरहरु बिना उपचार आफै केही समयमा ठीक भएर जान्छ । यदि ठीक नभएमा नजिकको स्वास्थ्य संस्थामा तुरुन्त जाऔं र जाने सल्लाह दिऔं । हात्तीपाईलेको औषधि खाएर आफू र आफ्ना सन्ततीहरुलाई रोग लाग्नबाट बचौं र बचाऔ ।
मिति २०७२ फाल्गुण २९, ३० र चैत्र १ गते औषधि खुवाइने जिल्लाहरु:
भोजपुर, इलाम, झापा, धनकुटा, तेह्रथुम, ओखलढुंगा, पाँचथर, सप्तरी, सिरहा, सुनसरी, ललितपुर, वाग्लुङ, म्याग्दी, पर्वत, लमजुङ, दाङ, रोल्पा, रुकुम, सल्यान, बाँके, बर्दिया, जाजरकोट, सुर्खेत, दैलेख, बैतडी, डडेलधुरा, डोटी, कैलाली, कञ्चनपुर, अछाम, बझाङ, बाजुरा र दार्चुला ।
स्वास्थ्य मन्त्रालय
स्वास्थ्य सेवा विभाग
इपिडिमियोलोजी तथा रोग नियन्त्रण महाशाखा