काठमाडौं, ५ भदौ । आयुर्वेद चिकित्सा परिषद्को रजिस्ट्रारमा डा. हरि शरण अर्याल नियुक्त भएका छन् । उनले शुक्रबार स्वास्थ्य तथा खाद्य स्वच्छता मन्त्री निशा मेहता समक्ष पद तथा गोपनीयताको शपथ ग्रहण गरेका छन् ।

डा. अर्यालले त्रिभुवन विश्वविद्यालयअन्तर्गत आयुर्वेद क्याम्पसबाट बीएएमएस तथा कायचिकित्सा विषयमा एमडी गरेका छन् । उनले एमडीमा स्वर्ण पदकसहित विशिष्ट श्रेणी हासिल गरेका थिए ।

उनी सन् २००९ देखि नेशनल नेचर केयर हस्पिटलमा मेडिकल डाइरेक्टरका रूपमा कार्यरत छन् । यसअघि नरदेवीस्थित आयुर्वेद अस्पतालमा कन्सल्टेन्ट कायचिकित्सकका रूपमा समेत काम गरेका छन् ।

डा. अर्याल नेपाल आयुर्वेद मेडिकल काउन्सिलका पूर्व कार्यकारी सदस्य तथा सिंहदरबार वैद्यखाना विकास समितिका पूर्व कार्यकारी सदस्यसमेत हुन् ।

परिषद्मा यसअघि डा सिद्धार्थकुमार ठाकुर अध्यक्ष पदमा नियुक्त भईसकेका छन् ।

नव नियुक्त रजिष्ट्रार अर्यालले आजै स्वास्थ्य मन्त्री मेहतासंग पद तथा गोपनियताको सपथ लिएका छन् ।