काठमाडौँ, ८ साउन । पाल्पाको तानसेनमा रहेको मिलेनियम सेकेण्डरी स्कुलको क्यान्टिनमा खाजा पकाउने क्रममा ग्यासको पाइप फुस्किएर आगलागीमा परेकी ८ वर्षीया छात्रा सजुदा बानुको उपचार अहिले कीर्तिपुरस्थित बर्न अस्पतालमा भइरहेको छ ।

उपचारमा सम्लग्न चिकित्सकहरुको अनुसार उनको शरीरको ४५ प्रतिशत जलेको छ । चिकित्सकहरुले अवस्था गम्भीर रहेको बताएका छन् ।

अस्पतालका निर्देशक डा किरण नकर्मीले ती बालिकाको शरीरको ४५ प्रतिशत बढी भाग जलेको बताए । ‘गहिरोसंग जलेको छ । अवस्था गम्भीर छ,’ छोटो प्रतिक्रिया दिदै उनले भने ।

हिजो दिउसो दुर्घटनामा परेपछि उनको तानसेनस्थित मिसन अस्पतालमा उपचार भएको थियो । पछि थप उपचारका लागि हेलिकप्टरमा काठमाडौँ ल्याइएको थियो ।

स्कुलको क्यान्टिनमा खाजा खाइरहेका बेला नजिकै रहेको खाना पकाउने ग्यासको पाइप फुस्किएपछि आगो फैलिएको बताइएको छ।