कैलाली, ३ साउन । कैलालीका सांसद केपी खनाल गेटास्थित शहीद दशरथ चन्द स्वास्थ्य विज्ञान विश्वविद्यालयको भौतिक पूर्वाधारको निरीक्षणमा पुगेका छन् ।

यसै शैक्षिक सत्र देखि एमबीबीएस अध्यापन सञ्चालनको योजना बनिरहेको विश्वविद्यालयको पूर्वाधार निरीक्षणका क्रममा खनालसंग उपकुलपति प्राडा सुनीलकुमार जोशी र रजिष्ट्रार डा भीम चन्द संगै थिए ।

निरीक्षण पछि सामाजिक सञ्जाल फेसबुकमा सांसद खनालले ‘प्रक्रियाका सबै कुरा समय मै भए हामीले यो बर्षमै मेडिकल अध्ययन सुरु हुनेछ,’ भनेर लेखेका छन् । त्यसअघि उनले ‘सुदुर अब दुर नाई : सुदुरपश्चिमको भूमिमा अब एप्रोन लगाउदै एमबीबीएस पढाई सुरु हुने दिन आउँदैछ,’ भनेर समेत उल्लेख गरेका छन ।

सरकारले गत साता मात्रै खुल्ला प्रतिस्पर्धाबाट शहीद दशरथ चन्द स्वास्थ्य विज्ञान विश्वविद्यालयको उपकुलपति पदमा प्राडा जोशी र रजिष्ट्रारमा डा चन्दलाई नियुक्त गर्ने निर्णय गरेको थियो । उनीहरुले गेटा पुगेर जिम्मेवारी सम्हालिसकेका छन् ।