काठमाडौँ , २२ बैशाख । नेपाल चिकित्सक संघको निर्वाचन अन्तर्गत सुरु भएको मतगणना काठमाडौँ उपत्यका बाहिर रहुन्जेल अध्यक्ष पदका उम्मेदवार डा बद्री रिजाल अर्का उम्मेदवार डा मंगल रावल भन्दा पछि पछि थिए ।

तर, जब काठमाडौँ उपत्यकामा गणना गर्ने पालो आयो मतान्तरको गियर एकाएक बदलियो ।

भोटको रफ्तार यसरी बढ्यो कि १३७ मत गणना बाँकी छँदै उनको जीत सुनिश्चित भईदियो ।

कुल खसेको ७१०२ मत मध्ये ६९६५ मत गणना सम्पन्न हुँदा डा रिजालले ३१३२ मत प्राप्त गरे । उनीसंग पछि परेका डा रावलको २८८४ मात्रै आयो ।

अब गणना हुन बाँकी १३७ मत मात्रै छ तर डा रिजालले डा रावलसंग मतान्तर २४८ बनाई सके । यस कारण अब जीत औपचारिक घोषणा हुन मात्रै बाँकी छ ।

डा रावलले आफ्नो हार स्वीकार गर्दै डा रिजाललाई शुभकामना समेत दिई सकेका छन् ।

उनले आफूले उठाएका एजेण्डाहरुमा नयाँ कमिटिले काम गर्ने विश्वास लिएको समेत उल्लेख गरेका छन् ।