काठमाडौँ, १४ मंसिर । नेपालमा एचआईभी संक्रमितको संख्या ३४ हजार नाघेको छ ।

विश्व एड्स दिवसको अवसरमा आइतबार आयोजित अन्तरक्रिया कार्यक्रममा राष्ट्रिय एड्स तथा यौन रोग नियन्त्रण केन्द्रका निर्देशक डा. सर्वेश शर्माले नेपालमा ३४ हजार ३ सय ३७ जनालाई एचआईभी संक्रमण भएको जानकारी दिएका हुन् ।

उनकाअनुसार कुल संक्रमितमध्ये १५ वर्षभन्दा माथिका ३३ हजार २ सय ७९ जना छन् । त्यस्तै १५ वर्षमाथिका १४ हजार जना महिलामा एचआइभी संक्रमण छ ।

उनले १५ वर्षभन्दा माथिका एचआईभी संक्रमित पुरुषको संख्या १९ हजार २ सय ७९ छ । एक हजार ५८ जना एचआइभी पोजेटिभ बालबालिका रहेको उनले बताए ।

गत एक वर्ष आमालाई एचआईभी परीक्षण गर्दा २ सय २७ जना बालबालिकामा संक्रमण पुष्टि भएको हो । सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको डा। शर्माले बताए ।

सरदर दिनमा १.७ जना नयाँ संक्रमित थपिइरहेका छन् भने दिनमा एक जनाको एचआईभीका कारण मृत्यु भइरहेको छ । ‘सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको छ।

तर अझै हामी ९० प्रतिशतसम्म पुग्नुपर्नेछ। सरदर दिनमा एउटा जस्तो वा १.७ जना नयाँ क्लाइन्टहरु थपिने अवस्था छ । मृत्युको दरको कुरा गर्ने हो भने लगभग दिनमा एउटा जस्तो एचआईभीको कारणले मृत्यु हुने गर्दछ’, उनले भने ।

डा शर्माका अनुसार ८८ प्रतिशत एचआईभी संक्रमित औषधि खाइरहेका छन् । संक्रमितमध्ये ७६ प्रतिशतले शरीरमा भाइरसको मात्रा कति छ भनेर परीक्षण गरिरहेको उनले बताए ।

उनले काठमाडौंँ उपत्यकामा एड्स तथा यौन रोगसम्बन्धी औषधि सेवन गर्नेको संख्या सबैभन्दा बढी रहेको बताए । दोस्रोमा मधेसमा एचआइभीको अवस्था बढ्दो अवस्थामा छ । एचआइभीको अवस्था मात्रै नभैइ मधेसमा स्वास्थ्य अवस्था नै कमजोर छ । हामी यो वर्ष मधेसलाई नै मुख्य केन्द्रमा राखेर स्वास्थ्यको कार्यक्रमहरु गर्ने प्रयत्नमा छौं । तेस्रोमा लुम्बिनी प्रदेश छ । सबैभन्दा कम कर्णाली प्रदेशमा देखिएको छ । एचआइभीको औषधि खाने कर्णाली र सुदूरपश्चिममा कम रहेको उनले बताए ।