काठमाडौँ, १५ भदौ । राष्ट्रिय स्वतन्त्र पार्टी (रास्वपा) ले रूपन्देही क्षेत्र नम्बर ३ मा डा. लेखजंग थापालाई उम्मेदवार बनाउने घोषणा गरेको छ। भैरहवाका डा. थापा वरिष्ठ न्युरोलोजिष्ट, अभियन्ता र सामाजिक व्यक्तित्वको रुपमा परिचित छन् ।

आइतबार पार्टी कार्यालयमा पत्रकार सम्मेलन गरी रास्वपाले डा थापालाई उम्मेद्धार बनाउने निर्णय गरेको जानकारी दिएको छ । सम्मेलनमा पार्टी उपसभापति डिपी अर्यालले थापालाई लेखजंगलाई बनाउने घोषणा गरेको जानकारी दिए । सो क्रममा उनले प्राइमरी इलेक्सन गरी उम्मेदवार छानेको बताए ।

क्षेत्र नं ३ मा उम्मेद्धार बन्न रास्वपाबाट ९ जना आकांक्षी थिए ।

नेपाली न्युरो साइन्सको विकास र बिरामी उपचारमा १६ वर्षभन्दा बढी समय बिताएका छन् ।

पोखराको मणिपाल कलेज अफ मेडिकल साइन्सेजबाट एमबीबीएस, बीपी कोइराला स्वास्थ्य विज्ञान प्रतिष्ठानबाट इन्टरनल मेडिसिनमा एमडी र कलेज अफ मेडिकल साइन्सेज चितवनबाट डीएम न्यूरोलोजी अध्ययन गरेका डा. थापा अमेरिकाको हार्वार्ड विश्वविद्यालयको ‘सेफ्टी क्वालिटी लिडरसीप एण्ड इन्फर्मेटिभ’का ग्राजुएट्स हुन्।

उनी नेपाल स्ट्रोक एशोसिएसनका संस्थापक अध्यक्षसमेत हुन् ।

निर्वाचन आयोगले कात्तिक १७ गते रूपन्देही क्षेत्र नम्बर – ३ र मनाङमा निर्वाचन गर्ने घोषणा गरेको छ।