काठमाडौँ, १५ भदौ । त्यसो त काठमाडौँको त्रिभुवन अन्तराष्ट्रिय विमानस्थलमा एयर एम्बुलेन्स बिमान आउनु जानु नयाँ कुरा होईन ।

विदेशी चार्टर एयर एम्बुलेन्स नेपालका उच्च अधिकारी तथा परिवारका सदस्यहरुलाई ‘रिसिभ’ गर्न धेरै पटक काठमाडौँ आएका छन् । महंगो मूल्यमा नेपालीहरुले विदेशी कम्पनीका एयर एम्बुलेन्स चार्टर गर्ने गरेका छन् ।

तर, अब भने नेपालीले आवश्यक पर्दा आफ्नै कल साइनको एयर एम्बुलेन्स विमान प्रयोग गर्न पाउने छन् ।

अमेरिकी सहयोग अन्तर्गत नेपाली सेनाले प्राप्त गरेको नेपालकै पहिलो अत्याधुनिक सैनिक एयर एम्बुलेन्स विमान शनिबार काठमाडौँ अवतरण भएको छ ।

अमेरिकाले नेपाली सेनालाई दुईवटा विमान उपलव्ध गराएको छ, त्यसमध्ये एउटा एयर एम्बुलेन्स र अर्को बहुउपयोगी युटिलिटी एयरक्राफ्ट स्काई ट्रक रहेको छ ।

सैनिक प्रवक्ता सहायक रथि राजाराम बस्नेतका अनुसार अमेरिकी सहयोग अन्तर्गत ‘ल्यान्ड फोर्सेस टक (एलएएफटी)’ कार्यक्रममार्फत सेनालाई यी विमानहरु प्राप्त भएको हो ।

यी विमानलाई आउँदो साता अमेरिकी दूतावासले त्रिभुवन अन्तर्राष्ट्रिय विमानस्थलमा रहेको सेनाको मिड एयर बेसमा हस्तान्तरण गर्ने भनिएको छ ।

शनिबार (हिजो) त्रिभुवन अन्तराष्ट्रिय विमानस्थलमा अवतरण भएका यी विमानहरु गएको सोमबार पोल्यान्डबाट नेपालका लागि उडेका थिए ।

यी विमान पोल्यान्डका पाइलटहरूले ‘स्पेसल फेरी फ्लाइट’ गरेर उडाएका थिए । यिनलाई त्यहाँबाट ग्रिस, इजिप्ट, साउदी अरब, बहराइन, मस्कट हुँदै पाँचौँ दिन शुक्रबार पाकिस्तानको कराची ल्याइपुर्‍याएको थियो । त्यहाँबाट भारतको जयपुर हुँदै शनिबार काठमाडौंमा अवतरण भएको हो ।

एयर एम्बुलेन्सको लागत कति ?

रक्षा मन्त्रालय स्रोतका अनुसार, यी विमान करिब झन्डै ३ अर्ब रुपैयाँ बराबरको सहयोगमा प्राप्त भएका हुन् । अर्थ मन्त्रालयको वैदेशिक सहायता समन्वय स्रोतका अनुसार एयर एम्बुलेन्सको लागत १ अर्ब ५७ करोड हाराहारी रहेको छ । त्यसमा ४ करोड ६६ लाख रुपैयाँ बराबरको मेडिकल उपकरणहरु रहेको बताइएको छ ।

अर्को बहुउपयोगी कामका लागि प्रयोग हुने भनिएको स्काई ट्रकको लागत १ अर्ब ३८ करोड रुपैयाँ हाराहारी रहेको उल्लेख गरिएको छ ।

सैनिक स्रोतका अनुसार, नयाँ एयर एम्बुलेन्स अत्याधुनिक उपकरणसहित रहेको छ । यसमा अनबोर्ड मेडिकल इक्युपमेन्ट जडान गरिएका छन् । जसमा स्ट्रेचर, भेन्टिलेटर, अक्सिजन सपोर्ट प्रणाली, डिफिब्रिलेटर र आधारभूत शल्यक्रिया सामग्रीसमेत रहने छन् ।

यसले आकस्मिक अवस्थामा बिरामीलाई अस्पतालसम्म पुर्‍याउने क्रममा उडिरहेका बेला विमान भित्रै उपचार गर्न सकिने सुविधा उपलब्ध गराउनेछ ।