काठमाडौँ, १३ भदौ । नेपाल आयुर्वेद चिकित्सक संघले बालबालिकालाई स्वर्ण विन्दु प्राशाण थोपा खुवाउने स्वास्थ्य तथा जनसंख्या मन्त्रालय, आयुर्वेद तथा बैकल्पिक सेवा विभागको नयाँ कार्यक्रमको बचाउ गरेको छ ।

गत ५ भदौमा स्वास्थ्य मन्त्री प्रदीप पौडेलले धनगढी गएर यो कार्यक्रमको शुभारम्भ गरेका थिए । शुभारम्भ हुनासाथ कार्यक्रमबारेमा विभिन्न सञ्चार माध्यम तथा सामाजिक सञ्जालबाट टिकाटिप्पणी सुरु भएको थियो ।

संघले कार्यक्रम प्रति आएको टीका टिप्पणीप्रति आफ्नो धारणा सार्वजनिक गरेको हो ।

उसले विज्ञप्तीमा स्वर्णप्राशाणले बालबालिकाको शारीरिक मानसिक विकास र रोग प्रतिरोधि क्षमता बढाउने दावी गरेको छ ।

उसले विज्ञप्तीमा स्वर्णप्राशाणले बालबालिकाको शारीरिक मानसिक विकास र रोग प्रतिरोधि क्षमता बढाउने दावी गरेको छ ।

आयुर्वेदको करिब चार हजार वर्ष पुरानो ग्रन्थ काश्यप संहितामा स्वर्णविन्दु प्राशाणबारे स्पष्ट उल्लेख रहेको भन्दै संघले आयुर्वेद सेवा संघ सशर्त कार्यक्रम अन्तर्गत २०८२ सालमा स्वर्णविन्दु प्राशन कार्यक्रमको औपचारिक सुरुवात भएको समेत जानकारी दिएको छ ।

संघले जारी गरेको धारणा अनुसार, स्वर्णभस्म, ब्राह्मी घृत र शुद्ध महको निश्चित मात्राको मिश्रणलाई उमेर अनुसार १ देखि ४ थोपा बिन्दुरूपमा बालबालिकालाई दिने प्रावधान छ। यसमा प्रयोग गरिने स्वर्ण भस्म र ब्राह्मी घृत आयुर्वेद औषधि व्यवस्था विभागमा दर्ता भएको तथा शुद्ध मह नेपाल सरकारको खाद्य तथा गुण नियन्त्रण विभागबाट प्रमाणित हुने व्यवस्था गरिएको बताइएको छ।

संघले यस अभ्यासलाई जनसुरक्षित र प्रभावकारी बताउँदै भारत, श्रीलंका लगायतका देशका स्वास्थ्य संस्थानहरूमा यो प्रचलित रहेको उल्लेख गरेको छ। नेपालमा पनि प्रादेशिक आयुर्वेद चिकित्सालय बिजौरी, चितवन, पर्सा लगायतका स्वास्थ्य संस्थानमा विगत तीन वर्षदेखि प्रत्येक महिनाको पुष्य नक्षत्रको दिन ६ महिना देखि ५ वर्षसम्मका करिब ५० हजार बालबालिकालाई स्वर्णप्राशन दिइँदै आएको छ।

संघका अनुसार अहिलेसम्म यस प्रक्रियाबाट कुनै दुष्प्रभाव रिपोर्ट नभएको र बालबालिकाको सहभागिता दिनप्रतिदिन बढ्दो क्रममा रहेको छ।