काठमाडौँ, २८ चैत ।  स्वास्थ्य सचिव डा रोशन पोखरेलले अबको अनुसन्धान नसर्ने रोग र मानसिक स्वास्थ्यको विषयमा केन्द्रीत हुनुपर्ने बताएका छन् ।

नेपाल स्वास्थ्य अनुसन्धान परिषद्को आयोजनामा आज देखि सुरु भएको स्वास्थ्य तथा जनसंख्या वैज्ञानिकहरुको नवौँ शिखर सम्मेलनको उद्घाटन सत्रमा बोल्दै उनले सो कुरा बताएका हुन् ।

सचिव डा पोखरेलले परिषद्को अगुवाईमा कोभिडका बेला भएका अनुसन्धानले कोभिड नियन्त्रणका लागि चालेका कदमलाई सही दिशा दिन सकेको भन्दै अब भयावह रुपमा बढ्दै गएको नसर्ने रोग र मानसिक स्वास्थ्यमा केन्द्रीत हुनु पर्ने बताए ।

उनले परिषद्ले गर्ने अनुसन्धानबाट स्वास्थ्यका नीति बनाउन सजिलो भएको समेत बताए ।

एक प्रशंगमा उनले अब परिषद्लाई प्रदेश तहसम्म विस्तार गर्दै लैजाने तयारी भएको समेत बताए । स्वास्थ्य नीति बनाउन अनुसन्धानको जरुरी रहेको भन्दै यसको गुणात्मकतामा ध्यान दिन समेत आग्रह गरे ।