काठमाडौँ, १ असोज । समायोजनले घटुवा गरेको भन्दै स्वास्थ्य सेवा अन्तरगर्त यसअघि स्तरबृद्धि भएका पाँचौँ, छैटौँ र सातौँ तहका कर्मचारीहरु आन्दोलित भएका छन् । उनीहरुले स्वास्थ्य तथा जनसंख्या मन्त्रालय र सामान्य प्रशासन मन्त्रालयका अधिकारीहरुले गैरकानूनी ढंगबाट समायोजनका बेला आफूहरुको घटुवा गरेको आरोप लगाएका छन् ।

योग्यता नपुगेको भन्दै संघीय मामिला तथा सामान्य प्रशासन मन्त्रालयले यसअघि दफा ९ (१) बमोजिम स्तरबद्धि भएका कतिपय कर्मचारीहरुको पुरानै पदनाम तोकिदिएको छ । यसले अहेवबाट स्तरबृद्धि भई एचए भएका कर्मचारी फेरी अहेवमै झरेका छन् ।

जनस्वास्थ्यकर्मी बसन्त श्रेष्ठले स्वास्थ्य सेवा ऐन दफा ९ (१) बमोजिम आफूहरुको स्तरबृद्धि भई दशौँ बिसौँ बर्ष देखि त्यो पदमा कार्यरत भएको व्यक्तिलाई यति खेर आएर यो मिल्दैन भन्नु गैरकानूनी रहेको जिकिर गरे । उनले निजामति तर्फ एक तह बढुवा भएर समायोजन तथा पदस्थापन गरिएको तर स्वास्थ्यकर्मीहरुको झन् तह घटुवा गरेको आरोप लगाए ।

स्वास्थ्य मन्त्रालयका प्रवक्ता महेन्द्रप्रसाद श्रेष्ठले स्तरबृद्धि भएका पाँचौ छैटौँ र सातौँ तहका कर्मचारीहरुको समायोजनमा समस्या भएको भन्दै आफूहरुले सामान्य प्रशासन मन्त्रालयलाई लेखि पठाएको तर उताबाट नमिल्ने भन्ने उत्तर आएको जानकारी दिए । ‘खासमा अहिले भएका विभिन्न तहका कर्मचारीको समायोजन गर्ने मात्रै काम थियो । अहिले कसले कुन योग्यता लिएको छ भनेर हेर्ने होइन थियो । निजामति किताव खानामा रहेको विवरण अनुसार हुुनपर्नेमा त्यो भएन । यसले पहिले एक तहका काम गरेका कर्र्मचारीलाई मर्का पार्ने देखियो,’ उनले भने ।

समायोजनमा आफूको स्तरबृद्धि झनै घटुवा भएपछि स्वास्थ्यकर्मीहरु दिनहुँ गुनासो गर्न मन्त्रालय पुग्ने गरेका छन् ।