क्यान्सर रोक्न नयाँ ‘एचपिभी खोप’

hpv-vaccine

चितवन, १० भदौ – पाठेघरको मुखको क्यान्सर रोकथामका लागि चितवनमा नयाँ ‘एचपिभी खोप’ कार्यक्रम सञ्चालन गरिएको छ ।

गतवर्षबाट नेपालमा नमुना कार्यक्रमको रुपमा आएको यो खोपले पाठेघरमा हुने क्यान्सर रोक्न सहयोग पुग्ने स्वास्थ्य सेवा विभाग अन्तर्गत बाल स्वास्थ्य महाशाखाका खोप अधिकृत भरत भण्डारीले जानकारी दिए ।

उनले एचपिभी खोपको प्रभावकारिता ९० प्रतिशत रहेको जानकारी दिए । बिशेषगरी रोग लागेपछि उपचार गर्नुभन्दा लाग्नै नदिने उपाएका रुपमा यो खोप नेपालमा ल्याइएको हो, खोप अधिकृत भण्डारीले भन्नुभयो– यो कार्यक्रम नमुनाका रुपमा चितवन र कास्की जिल्लामा सञ्चालन गरिएको छ । दुई जिल्लामा सफल भए मुलुकभरी नै निःशुल्क खोप कार्यक्रम सञ्चालन गरिने उनले बताए।

नेपालमा अहिले निःशुल्क भएपनि बाहिर यसको खरिद मूल्य करिब रु १० हजार रहेको छ । विश्वका ६४ देशमा यो खोप सुरु गरिएको बताइएको छ ।

जिल्ला जनस्वास्थ्य कार्यालयको समन्वयमा भएको खोप कार्यक्रम अन्तर्गत कक्षा ६ का बालिकालाई खोप दिने गरिएको भण्डारीले बताए।

यस्तै १० वर्ष उमेर पुगेका तर विद्यालय नगएका बालिकालाई समेत खोप दिइने छ । नौ वर्ष उमेर मुनिकालाई दिन नमिल्ने भएकाले ६ कक्षाका बालिका छनोट गरिएको हो ।

कार्यक्रम अन्तर्गत चितवनमा सात हजार भन्दा बढी बालिकालाई खोप लगाइएको र यो पटक छुटेकालाई र गएको वर्ष एक मात्रा लगाएका र कक्षा ६ मा पढ्ने नयाँ बालिकालाई खोप दिइने महाशाखाका अर्का खोप कार्यक्रम अधिकृत वसन्तकुमार श्रेष्ठले जानकारी दिए।

वर्षमा यो खोप दुई पटक लगाइन्छ । अघिल्लो वर्ष पहिलो डोज लगाएका छात्रालाई पनि यो पटक पुनः लगाइने छ । त्यस्तै अहिले कक्षा ६ मा पढ्ने जिल्लाका सबै बालिकालाई यही भदौको तेस्रो सातामा खोप लगाईने श्रेष्ठले जानकारी दिए ।

खोपसँगसँगै पाठेघरको मुखको क्यान्सरका लागि परीक्षणको कार्यक्रम समेत परिवार महाशाखामार्फत आएको जिल्ला जनस्वास्थ्य कार्यालय चितवनका प्रमुख मधुसुदन कोइरालाले जानकारी दिए।

पाठेघरको मुखको क्यान्सर एक किसिमको एचपिभी भन्ने भाइरसबाट सर्छ । यौन सम्पर्कका बेला यो रोग सर्ने भएकाले यौन सम्पर्क हुनुअघि नै खोप लगाए रोकथाम हुने भएकाले ६ कक्षाका बालिकालाई खोप दिने कार्यक्रम आएको हो ।

एक तथ्याङ्क अनुसार विश्वमा हरेक वर्ष पाठेघरको मुखको क्यान्सरबाट दुई लाख ७० हजारको मृत्यु हुने गरेको छ । त्यसमध्ये ८५ प्रतिशत विकासोन्मुख देशका हुने गरेका छन् । विश्वमा फोक्सोको क्यान्सर सबैभन्दा बढी हो भने त्यसपछि पाठेघरको मुखको क्यान्सर हो । नेपालमा वर्षको १० हजार महिला यो रोगबाट पीडित हुने गरेको तथ्याङ्क छ । रासस

समाचार / स्वास्थ्य सामाग्री पढनु भएकोमा धन्यवाद । दोहरो संम्वाद को लागी मेल गर्न सक्नु हुन्छ ।
सम्पर्क इमेल : nepalihealthnews@gmail.com

Leave a Reply

Your email address will not be published. Required fields are marked *