एजेन्सी । अमेरिकी औषधि कम्पनी मोडेर्ना र मर्कले विकास गरेको प्रयोगात्मक क्यान्सर खोपले उच्च जोखिमयुक्त मेलानोमा (छालाको घातक क्यान्सर) भएका बिरामीमा क्यान्सर पुनः फर्किने वा शरीरका अन्य भागमा फैलिने जोखिम घटाउन सक्ने संकेत देखाएको छ।

तेस्रो चरणको परीक्षणबाट प्राप्त प्रारम्भिक नतिजाले खोप र क्यान्सरविरुद्धको औषधीको संयुक्त प्रयोगले बिरामीहरू क्यान्सरमुक्त रहने अवधि बढाउन सफल भएको कम्पनीहरूले दावी गरेका छन् ।

तर कम्पनीहरूले परीक्षणको नयाँ तथ्यांक अहिलेसम्म वैज्ञानिक जर्नलमा प्रकाशित गरेका छैनन्।

उनीहरूले आगामी चिकित्सा सम्मेलनमा विस्तृत नतिजा प्रस्तुत गर्ने र नियामक निकायलाई उपलब्ध गराउने बताएका छन्।

मेलानोमा छालाको सबैभन्दा घातक क्यान्सरमध्ये एक हो।

यसको शल्यक्रिया गरिसकेका उच्च जोखिमयुक्त बिरामीमा यो खोपको परीक्षण गरिएको हो।

इन्टिस्मेरान नाम दिइएको एमआरएनए खोपलाई मर्कले विकास गरेको क्यान्सर प्रतिरोधी औषधि किट्रुडा सँग मिलाएर प्रयोग गरिएको थियो।

परीक्षणको प्रारम्भिक नतिजाअनुसार खोप र किट्रुडाको संयुक्त प्रयोगले क्यान्सर पुनः फर्किनुअघि समय बढाएको देखिएको छ। यद्यपि, यो प्रभाव कति लामो समयसम्म कायम रहन्छ भन्नेबारे कम्पनीहरूले अहिलेसम्म स्पष्ट जानकारी दिएका छैनन्।

एक हजारभन्दा बढी बिरामीमा परीक्षण

तेस्रो चरणको परीक्षणमा १ हजार १३७ जना बिरामी सहभागी थिए। उनीहरूलाई दुई समूहमा विभाजन गरी करिब एक वर्षसम्म एक समूहलाई इन्टिस्मेरान खोप र किट्रुडाको संयुक्त उपचार तथा अर्को समूहलाई किट्रुडा मात्र दिइएको थियो।

कम्पनीका अनुसार परीक्षणमा अहिलेसम्म नयाँ किसिमको सुरक्षा समस्या देखिएको छैन।

यसअघि गरिएको सानो चरणको परीक्षणमा खोप र औषधिको संयुक्त प्रयोगबाट देखिएका अधिकांश साइड इफेक्ट सामान्य वा मध्यम प्रकृतिका थिए। यद्यपि, केही बिरामीले प्रतिकूल असरका कारण उपचार रोक्न वा केही समयका लागि स्थगित गर्नुपरेको थियो।

यसअघि जुन महिनामा सार्वजनिक गरिएको १५७ जना बिरामीमा गरिएको अध्ययनमा खोप र किट्रुडाको संयुक्त प्रयोगले पाँच वर्षपछि मेलानोमा पुनः फर्किने जोखिम करिब आधाले घटाएको देखिएको थियो। उक्त अध्ययनको नतिजा जर्नल अफ क्लिनिकल अन्कोलोजी मा प्रकाशित भइसकेको छ।

बिरामीको क्यान्सरअनुसार तयार हुन्छ खोप

इन्टिस्मेरानको विशेषता भनेको यसलाई प्रत्येक बिरामीको क्यान्सरअनुसार व्यक्तिगत रूपमा तयार गर्न सकिनु हो।

क्यान्सरका कोषिकाको सतहमा देखिने असामान्य प्रोटिनलाई ‘निओएन्टिजेन’ भनिन्छ। यही असामान्य प्रोटिनलाई पहिचान गरी क्यान्सरका कोषिका नष्ट गर्न शरीरको प्रतिरक्षा प्रणालीलाई तालिम दिने गरी खोप विकास गरिएको हो।

बिरामीको ट्युमरबाट प्राप्त आनुवंशिक सामग्रीको विश्लेषण गरेर उसको क्यान्सरमा देखिएका विशेष निओएन्टिजेन पहिचान गरिन्छ। त्यसका आधारमा सम्बन्धित बिरामीका लागि खोप तयार गरिन्छ। यस्तो खोप तयार गर्न केही हप्ता लाग्ने अनुसन्धानकर्ताहरूले बताएका छन्।

न्युयोर्कस्थित एनवाईयू ल्याङ्गोन हेल्थकी मेलानोमा विशेषज्ञ डा. जेनिस मेहनर्टका अनुसार मेलानोमा अन्य धेरै क्यान्सरको तुलनामा शरीरको प्रतिरक्षा प्रणालीप्रति बढी संवेदनशील हुने भएकाले खोपका लागि उपयुक्त क्यान्सर हो।

उनले वर्षौंको अनुसन्धानपछि एक हजारभन्दा बढी बिरामीमा गरिएको ठूलो परीक्षणबाट सकारात्मक नतिजा आउनुलाई निकै उत्साहजनक उपलब्धि भएको बताएकी छन्।

क्यान्सर उपचारमा एमआरएनएको नयाँ सम्भावना

कोभिड–१९ विरुद्धका खोप बजारमा आएपछि एमआरएनए प्रविधि व्यापक रूपमा चर्चामा आएको थियो। तर वैज्ञानिकहरूले त्यसअघि नै क्यान्सर उपचारमा एमआरएनए प्रविधिको सम्भावनाबारे दशकौँदेखि अनुसन्धान गर्दै आएका थिए।

मोडेर्ना र मर्कले मेलानोमाविरुद्धको यो खोपमा करिब एक दशकदेखि काम गर्दै आएका छन्। यसको उद्देश्य बिरामीको आफ्नै प्रतिरक्षा प्रणालीलाई क्यान्सरका कोषिका पहिचान गरी नष्ट गर्न सक्षम बनाउनु हो।

मोडेर्नाका प्रमुख कार्यकारी अधिकृत स्टेफान बान्सेलले तेस्रो चरणको परीक्षणको नतिजालाई क्यान्सर अनुसन्धानका क्षेत्रमा महत्वपूर्ण मोडका रूपमा व्याख्या गरेका छन्।

यो अध्ययन भने अझै जारी रहनेछ। उपचारपछि बिरामी कति समयसम्म बाँचिरहेका छन् भन्ने समग्र जीवनदर समेत अध्ययन गरिने कम्पनीहरूले बताएका छन्।

सकारात्मक नतिजापछि मोडेर्नाको शेयर १४७ प्रतिशतसम्म बढ्यो

मेलानोमा खोपको परीक्षणमा सकारात्मक नतिजा सार्वजनिक भएपछि बुधबार मोडेर्नाको शेयर मूल्य १४७ प्रतिशतसम्म बढेको थियो। मर्कको शेयर मूल्य पनि करिब १३ प्रतिशतले बढेको थियो।

मोडेर्नाले कोभिड–१९ विरुद्धको खोपपछि एमआरएनए प्रविधिमा आधारित अन्य खोप तथा उपचार विकास गर्दै आएको छ।

अमेरिकी खाद्य तथा औषधी प्रशासन (एफडीए)ले यसै महिना मोडेर्नाले विकास गरेको एमआरएनए प्रविधिमा आधारित पहिलो फ्लु खोपलाई पनि स्वीकृति दिएको छ।

तर अमेरिकामा पछिल्लो समय एमआरएनए अनुसन्धानको भविष्यबारे भने बहस चलिरहेको छ।

अमेरिकी स्वास्थ्य सचिव रोबर्ट एफ। केनेडी जुनियरले एमआरएनए प्रविधिको आलोचना गर्दै आएका छन् भने सरकारले गत वर्ष एमआरएनए खोप अनुसन्धान तथा विकासका लागि गरिएका करिब ५० करोड अमेरिकी डलर बराबरका सम्झौता कटौती गरेको थियो।

यसैबीच मेलानोमाविरुद्धको व्यक्तिगत एमआरएनए खोपको पछिल्लो सकारात्मक नतिजाले भने क्यान्सर उपचारमा बिरामीको आफ्नै ट्युमरअनुसार तयार गरिने खोपको सम्भावनालाई थप बल दिएको बताइएको छ ।