काठमाडौँ, १९ साउन । सरकारले झण्डै तीन वर्ष पछि कान्ति बाल अस्पतालको नेतृत्व परिवर्तन गरेको छ । १३ भदौ २०८० मा निर्देशक बनेका डा. पंकज राय आजबाट जिम्मेवारी मुक्त भएका छन् ।

नयाँ निर्देशकको रुपमा कान्तिको नेतृत्व गर्न डा. रामहरि चापागाँई आएका छन् ।

स्वास्थ्य तथा खाद्य स्वच्छता मन्त्री निशा मेहताले आज मन्त्रिस्तरीय निर्णय गर्दै डा. रायले सम्हाल्दै आएको जिम्मेवारी डा. चापागाईँलाई सारेकी हुन् । डा. चापागाईँ पनि एघारौँ तहका चिकित्सक हुन् ।

डा. रायलाई तत्कालीन स्वास्थ्य मन्त्री मोहन बस्नेतले कान्तिको नेतृत्व सुम्पिएका थिए ।  त्यस यता उनी लगातार नेतृत्वमा रहेर काम गरेका थिए ।

उनी लगातार लामो समय कान्तिको नेतृत्व गर्ने निर्देशकको रुपमा पर्दछन् ।

अघिल्लो साता नेपाल चिकित्सक संघले आकस्मिक बाहेकका सेवा बन्द गर्दा उनी सरकारी गाडी लिएर निजीमा सेवा दिन गएको भन्दै भिडियो भाइरल भएको थियो ।

त्यसपछि मन्त्रालयले उनीमाथि स्पष्टीकरण सोधेको थियो ।

‘स्पष्टीकरणको प्रक्रिया एकातिर चलि नै रहेको छ तर अहिले उहाँलाई जिम्मेवारी मुक्त गरियो,’ मन्त्रालय उच्च स्रोतले भन्यो ।