काठमाडौँ, १८ बैशाख । नेपाल चिकित्सक संघको निर्वाचन अन्तर्गत आज काठमाडौँको प्रज्ञाभवन कमलादी मतदान केन्द्रमा कुल १ हजार २२३ मत खसेको छ । संघको २०८२ – २०८५ कार्यकारिणी समितिका लागि भइरहेको निर्वाचन अन्तर्गत आज र भोली उपत्यकामा मतदान हुँदैछ ।

प्रमुख निर्वाचन अधिकृत डा प्रणयरत्न शाक्यले काठमाडौँ उपत्यकामा दुई दिन हुने मतदान अन्तर्गत आज पहिलो दिन १ हजार २२३ मत खसेको बताए । विहान ८ बजे देखि बेलुका ६ बजेसम्म मतदान भइरहेको थियो । भोली पनि सोही स्थान र समयमा मतदान चल्ने शाक्यले बताए ।

आज सरकारी अस्पतालहरुमा ओपिडी सेवा सञ्चालन हुने भएकोले पनि अपेक्षाकृत केही कम मत खसेको अनुमान छ ।

निर्वाचन समितिले भोली बेलुका मतदान सकिएपछि मतगणनाको प्रकृयामा प्रवेश गर्ने बताएको छ । निर्वाचन अन्तर्गत उपत्यका बाहिर ४ र ५ बैशाखमा निर्वाचन सम्पन्न भईसकेको छ ।