निर्वाचन समिति !

पाटन उच्च अदालतको आदेशबाट म लगायत अन्य उम्मेदवारहरूको उम्मेदवारी कायम भएको तथ्य स्वयंमा स्पष्ट सन्देश हो कि ‘ अब  कुनै पनि प्रकारको अन्याय, पूर्वाग्रह र शक्ति दुरुपयोग सह्य हुने छैन।’

यस अवस्थापछि पनि यदि निर्वाचन प्रक्रियामा कुनै किसिमको चलखेल, पक्षपात वा निर्देशनमुखी गतिविधि देखिन्छ भने त्यसको सम्पूर्ण जिम्मेवारी निर्वाचन समिति र सम्बन्धित पक्षहरूले लिनु पर्नेछ।

हामी स्पष्ट गर्न चाहन्छौं कि अबको निर्वाचन केवल औपचारिकता होइन, यो नेपाल चिकित्सक संघभित्रको बिकृति, समूहवाद र सत्ताको दुरुपयोग विरुद्धको निर्णायक संघर्ष हो।

निर्वाचन समिति पूर्ण रूपमा स्वतन्त्र, निष्पक्ष र दबाबमुक्त भएर काम गर्न बाध्य छ। कुनै पनि राजनीतिक, व्यक्तिगत वा संस्थागत प्रभावमा परेर गरिएको निर्णय अस्वीकार्य हुनेछ। नेपाल चिकित्सक संघका तलबभोगी कर्मचारीहरू समेत कुनै गुट वा पक्षको साधन बन्न खोजे त्यसलाई गम्भीर उल्लंघनका रूपमा लिइनेछ।

वर्तमान कार्यसमितिलाई पनि स्पष्ट सन्देश दिन चाहन्छौं—अब नैतिकता, पारदर्शिता र उत्तरदायित्वबाट भाग्ने ठाउँ छैन।

यदि पुनः अन्यायपूर्ण हस्तक्षेप वा प्रभाव देखियो भने त्यसको प्रतिवाद कडा रूपमा हुनेछ, चाहे त्यो कानुनी, संस्थागत वा पेशागत स्तरमै किन नहोस्।

यो केवल निर्वाचन होइन, यो सम्पूर्ण चिकित्सक समुदायको स्वाभिमान, अधिकार र संस्थागत गरिमाको रक्षा गर्ने अभियान हो। हामी कुनै पनि मूल्यमा निष्पक्ष निर्वाचन सुनिश्चित गराउनेछौं।

अन्त्यमा, हामी चेतावनी दिन चाहन्छौं—यदि निर्वाचन प्रक्रिया निष्पक्ष र पारदर्शी भएन भने त्यसको परिणाम दूरगामी हुनेछ र त्यसको जिम्मेवारी सम्बन्धित पक्षहरूले नै व्यहोर्नुपर्नेछ।

धन्यवाद।

भवदीय,

प्राडा अजय कुमार मिश्र
NMA नं. ३७८९ / L-३२३९
NMC नं. ९७७०

बरिष्ठ उपाध्यक्ष पदको उम्मेदवार
नेपाल चिकित्सक संघ निर्वाचन २०८२